Ulaanbaatar
Даамын ахмадын УАШТ-ээс олон шинэ аварга төрлөө
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Монголын даамын холбоо /МДХ/-ноос Ж.Нямдорж агсны нэрэмжит ахмад даамчдын улсын аварга шалгаруулах тэмцээнийг өнгөрсөн /10.30-11.01/ амралтын өдрүүдэд “Монгол Коосэн” сургуульд зохион байгуулав.
Энэ жил 28 дахь удаагаа зохион байгуулсан тус тэмцээнд нийт 61 даамчин өрсөлджээ. Тэмцээний эрэгтэйчүүдийн 51-64 насны ангилалд 27 даамчин швейцар системээр 7 өрөг тоглоход адилхан 12 оноотой гурван тамирчин гарсан бөгөөд нэмэлт үзүүлэлт буюу коэффициентийн давуугаар спортын мастер Б.Ганзориг (Алдар) аваргалж, ДДХМ Д.Ганболд (Энэрэл), спортын мастер Б.Батжаргал (ББЖ мастер) нар удааллаа. Гадаадад олон жил ажиллаж, амьдарсан Б.Ганзоригийн хувьд ахмадын УАШТ-д анх удаагаа оролцоод түрүүлсэн байна.
Харин эрэгтэйчүүдийн 65-аас дээш насны ангилалд 26 даамчин ухаанаа уралдуулж, дэд мастер С.Энхээ (БЗД) 12 оноо авсан амжилтаар мөн анхны түрүүгээ хүртэж, спортын мастер Р.Цэнд (БЗД) 11 оноогоор мөнгө, спортын мастер П.Бат-Очир (БГД) 10 оноогоор хүрэл медалийн эзэд боллоо. Олон жил тогтвортой, тууштай тоглож буй С.Энхээ уг амжилтаараа спортын мастер цолны болзлыг хангасан юм.
Эмэгтэйчүүдийн
ангилалд 8 тамирчин тойргийн журмаар өрсөлдсөнөөс тус тэмцээний олон удаагийн
аварга спортын мастер М.Хишигбаяр (Хүч), дэд мастер Г.Пагамжав (Орхон) нар
адилхан 11 оноотой гарч, хоорондын тоглолтод хожсоноороо Г.Пагамжав аваргын
алтан медалийг мөн л анх удаагаа зүүсэн юм. Хүрэл медалийн эзнээр 10 оноотой
дэд мастер Д.Мөнхзаяа (Баянхонгор) тодорсон. Энэ үеэр зохиогдсон түргэн
тоглолтын тэмцээнд 34 тамирчин өрсөлдөж, спортын мастер П.Бат-Очир (БГД),
Б.Ганзориг (Алдар), ДДХМ Д.Ганболд (Энэрэл) нар эхний гурван байрыг эзэлжээ.
Нээлтийн ажиллагааны үеэр тус тэмцээний 5 удаагийн аварга Р.Цэндийг БТСУХ-ны "Спортын алдар" одонгоор шагналаа. Ивээн тэтгэгчдээс тусгай шагналыг спортын мастер Д.Бямбаа (СХД), Г.Сүхбат (Дархан-Уул), дэд мастер А.Оюун (Өвөрхангай), I зэргийн тамирчин Б.Лхагвасүрэн (Улаанбаатар) нарт олгосон юм.
Тэмцээнийг уламжлал ёсоор
1986 оны улсын аварга, спортын мастер Ж.Нямдорж агсны гэр бүл, үр хүүхдүүд 16
дахь жилдээ ивээн тэтгэв.
