Ulaanbaatar
С.Маттсон тэргүүтэй Европын 12 эмэгтэй бөх олимпын эрхээ өвөртлөв
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Бөхийн төрлүүдийн Европ тивийн олимпын эрх олгох тэмцээн Унгарын нийслэл Будапешт хотноо болж чөлөөт бөхийн төрөлд эмэгтэйчүүдийн 6 жинд 12 тамирчин эрхээ авч Токиог зорихоор болов.
Тухайлбал, “Рио-2016” олимпын наадмын хүрэл, ДАШТ-ий нэг алт, дөрвөн мөнгө, нэг хүрэл медальт, Европын наадмын хошой, Европын дөрвөн удаагийн аварга Шведийн алдарт бөх София Маттсон 4 дэх, олимп, дэлхийн аварга, ОХУ-ын Наталья Воробьева, ДАШТ-ий хошой хүрэл медальт, Европын 3 удаагийн аварга Латвийн Анастасья Григорьева нар 3 дахь олимпдоо зодоглохоор боллоо гэж Монголын чөлөөт бөхийн холбооноос мэдээллээ.
Харин ДАШТ-ий алт, мөнгөн
медальт, Европын дөрвөн удаагийн аварга Туркийн Ясемин Адар, ДАШТ-ий мөнгө,
хүрэл медальт Ивона Матковская, Дэлхийн гурван удаагийн медальт Унгарын Эмеше
Барка гээд туршлагатай бөхчүүд эрхээ авч чадаагүй байна.
Олимпын эрх авсан эмэгтэй
бөхчүүд:
50 кг-д Эвин Демирхан /Турк/,
Миглена Селишка /Болгар/
53 кг-д Ванесса
Колодинская /Беларусь/, София Маттссон /Швед/
57 кг-д Эвелина Николова /Болгар/,
Алина Акобия /Украин/
62 кг-д Анастасия
Григорьева /Латви/, Ирина Коляденко /Украин/
68 кг-д Кумба Ларрок /Франц/,
Ханум Велиева /ОХУ/
76 кг-д Василиса Марзалюк /Беларусь/, Наталья Воробьева /ОХУ/
Дашрамд дуулгахад, Монголын чөлөөт бөхийн шигшээ багаас “Токио-2020”
олимпын эрхээ авсан эмэгтэй, эрэгтэй тус бүр нэг тамирчин байгаа юм. Тодруулбал, эмэгтэйчүүдийн
68 кг-д Хөдөлмөрийн баатар, “Лондон-2012” олимпын хүрэл медальт, Дэлхийн хошой
аварга, ДАШТ-ий мөнгө, хүрэл медальт,
гавьяат тамирчин Соронзонболдын Батцэцэг, эрэгтэйүүдийн 65 кг-д Монголын багийн
анхны олимпын эрхийг ОУХМ Т.Тулга хүртээд байгаа аж. Уг олимпын эрх нь хувь
хүнд бус үндэсний шигшээ багт олгогддог юм байна.
