Ulaanbaatar
“Арвис” клуб футзаалны эмэгтэйчүүдийн цомын эзэд боллоо
МОНГОЛЫН МЭДЭЭ | СПОРТ
Улаанбаатар /МОНЦАМЭ/. “Ковид-19” цар тахлын нөхцөл байдлаас үүдэн 2 жилийн хугацаанд завсарласан эмэгтэйчүүдийн футзаалны тэмцээн уралдаанууд “Футзаалны эмэгтэйчүүдийн цом”-ын тэмцээнээр эхэллээ.
“Футзаалны эмэгтэйчүүдийн
цом”-ын медалийн төлөөх тоглолтууд өчигдөр болж “Арвис” клуб хүчтэй өрсөлдөгч
“UBC” багийг 3:2-оор хожиж аваргын цом хүртлээ.
Тус клубүүд 2 сарын өмнө хөл
бөмбөгийн “Эмэгтэйчүүдийн лиг”-ийн аваргын төлөө эн тэнцүү өрсөлдөж “UBC” баг ялаад байсан юм. Өнөөдрийн тоглолт ч
урьдын адил сонирхолтой болж 3:2-оор өндөрлөхөд “UBC” клубээс О.Цасан-Охин,
Н.Дашдулам, “Арвис” клубээс Ө.Бадамхатан, Т.Энх-Амгалан, Ө.Ундрах нар ур чадвараа харуулж гоол орууллаа.
Үзэгч олныг суудлаас нь
өндөлзүүлсэн шигшээ тоглолтын дараа тэмцээний хаалтын ёслол болж “Арвис” /алт/,
“UBC” /мөнгө/, “Туулын Том Тулнууд” /хүрэл/ клубийн бүсгүйчүүд өөрсдийн
медалийг энгэртээ гялалзуулав.
Мөн тус тэмцээн хувийн
амжилтаараа гялалзсан шилдэг тоглогчдыг тодруулахад, “Шилдэг хаалгач”-аар “ТТТ”
клубийн Б.Мөнхзул, “Шилдэг тоглогч”-оор “UBC” клубийн О.Цасан-Охин, “Шилдэг
довтлогч”-оор “Арвис” клубийн Ө.Ундрах нар тус тус тодорлоо.
Футзаалны тэмцээнийг удаан хүлээсэн охид бүсгүйчүүддээ эхний тэмцээндээ амжилттай оролцсонд нь МХБХ-ноос баяр хүргэж амжилт хүсэв. Нийт эмэгтэй тамирчид удахгүй эхлэх 18 хүртэлх насны охидын футзаалны лиг /2021.12.15-2022.03.16/ болон эмэгтэйчүүдийн футзаалны лигийн /2021.12.25-2022.04.03/ тэмцээндээ бэлтгэж эхлээд байгаа билээ.
