Ulaanbaatar
“Байкал опен” олон улсын тэмцээнд Монголын 40 бөх оролцоно
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Дөрөвдүгээр сарын 29-30-нд 11 орны шилдэг бөхчүүд Улаан-Үд хотноо 25 дахь удаагийн “Байкал Опен” тэмцээнд хүч үзэх гэж байна.
Эрэгтэй
чөлөөт бөхийн 10 жинд нийтдээ 200 орчим тамирчин оролцох бөгөөд урьдчилсан
байдлаар ОХУ-ын Буриадаас гадна ОХУ-ын I болон II шигшээ баг, Якут, Тува,
Дагестан, Умард Осет (Алания), Красноярск, Өвөрбайгалийн хязгаар, Эрхүү,
Кемерово, Чечень, Пермийн багууд оролцох төлөвтэй гэж Буриад улсын Спортын
бэлтгэлийн төвөөс мэдэгдэв.
Харин
Монгол Улсыг төлөөлөн 40 бөх, Беларусь 27 бөхтэй оролцох бол Узбекистан,
Кыргызстан, Армен, Тажикистан, Азербайжан, Марокко, Энэтхэг, Молдавын тамирчид хүч
үзнэ. Зохион
байгуулагч Буриадаас 50 орчим тамирчин оролцох юм.
Буриадын
нэртэй бөхчүүдээс ДАШТ-ий хүрэл медальт Евгений Жербаев, 2022 оны Поддубный
лигийн хүрэл медальт Жаргал Дамдинов, ОХУ-ын аварга шалгаруулах тэмцээний
медальт Алдар Балжинимаев, Даша Шарастепанов, олон улсын тэмцээний медальт
Булат Батуев нар багтжээ.
Түүнчлэн
Европын аварга шалгаруулах тэмцээний медальт Булат Баясхолонов, 20 хүртэлх
насны дэлхийн аваргын хүрэл медальт Илья Жибалов, Дмитриевийн тэмцээний аварга
Баир Баяндуев, ОХУ-ын аварга шалгаруулах тэмцээний медальт Жаргал Баяндуев,
Түмэн Бодиев, Оросын залуучуудын спартакиадын медальт Аюур Нимаев зэрэг залуус
нь ч хүч үзэх юм байна.
Тэмцээний шагналын санг дараах байдлаар зарлажээ. Аварга буюу алтан медальтнууд 100 мянган рубль, дэд аварга болсон мөнгөн медальтнууд 70 мянган рубль, хүрэл медальтнууд 50 мянган рублиэр шагнуулна. Харин аваргын дасгалжуулагч нь 50 мянган рубль хүртэх юм байна.
