Ulaanbaatar
ЗАВХАН: Хойд бүсийн сумдын иргэдэд хүрч үйлчлэх шүдний кабинеттай болжээ
ОРОН НУТГИЙН МЭДЭЭ | ЗАВХАН
Улиастай, 2025 оны дөрөвдүгээр сарын 4 /МОНЦАМЭ/. Завхан аймгийн Түдэвтэй сумын сум дундын Эрүүл мэндийн төв иж бүрэн шүдний кабинеттай болжээ.
Японы Хүүхдийг ивээх сан Денан төслийн санхүүжилтээр энэ оноос эхлэн Түдэвтэй суманд эрүүл мэндийн төсөл хэрэгжүүлж буй юм. Энэ төслийн хүрээнд иж бүрэн шинэ шүдний кабинетыг байгуулж өнөөдөр хүлээлгэн өглөө.
Шүдний кабинетыг байгуулснаар тус сумын иргэдээс гадна тойргийн Асгат, Сонгино, Баянтэс, Тэс зэрэг 8 сумын 16 мянга гаруй иргэн амны хөндийн эрүүл мэндийн тусламж үйлчилгээг хүртэх боломжтой боллоо.
Мөн 18 хүртэлх насны 6600 орчим хүүхэд амны хөндийн эрүүл мэндийн тусламж үйлчилгээг орон нутгаасаа авах боломж бүрдсэн байна.
Денан төслийн дэмжлэгээр Завханы сумын эрүүл мэндийн төвүүдэд шүдний кабинет байгуулж, шаардлагатай тоног төхөөрөмж, аппарат хэрэгсэл, эм тариа авахад дэмжлэг үзүүлэх. Эмч, ажилтнуудыг сургаж, чадавхжуулах ажлыг хийж байна.
Мөн зорилтот сумдын ерөнхий боловсролын сургуулиудын сурагчдын дунд эрүүл мэндийн клуб байгуулж, эрүүл мэндийн боловсрол олгох сургалт, нийгмийн эрүүл мэндийг дэмжихэд чиглэсэн олон талт үйл ажиллагааг явуулж байна гэж Завхан аймгийн ЗДТГ-аас мэдээлэв.
Ташрамд, Японы Хүүхдийг ивээх сан АНУ-д төвтэй Денан төслийн санхүүжилтээр 2012 оноос Архангай аймгийн Тариат, Эрдэнэмандал суманд, 2022 оноос Говь-Алтай аймгийн Чандмань суманд эрүүл мэндийн төсөл хэрэгжүүлж байна.
Шүдний кабинет
Шүдний кабинетыг нээх нээлтийн үйл ажиллагаа
Гэрэл зургийг: З.Ариунтуяа
