Ulaanbaatar
Яо Минийг ДАШТ-2019-ийн элчээр томиллоо
ДЭЛХИЙН МЭДЭЭ | СПОРТМОСКВА./TASS/. Алдарт сагсан бөмбөгчин Яо Мин 2019 онд Хятадад болох ДАШТ-ний элчээр томилогджээ. Энэ тухай Олон улсын сагсан бөмбөгийн холбоо /FIBA/ мэдэгдлээ.
ДАШТ эхлэхэд 1000 хоног үлдсэнийг тохиолдуулан өнгөрсөн ням гарагт Бээжин хотод болсон хүндэтгэлийн арга хэмжээний үеэр Яо Минийг ДАШТ-2019-ийн элчээр томилсон гэдгийг зарлан мэдэгдсэн байна.
Тэрбээр ёслолын үеэр үг хэлэхдээ “миний эх орон 1000 хоногийн дараа ДАШТ-ийг хүлээн авах гэж байгаад баяртай байна. Дэлхийн од тамирчид хүрэлцэн ирэхийг бид хүлээж байна, бид гайхамшигтай тоглолтуудыг үзэх болно” гэжээ.
2019 онд Хятадад болох эрэгтэй шилдэг багуудын ДАШТ-нд анх удаагаа 32 баг оролцох юм.
Яо Мин хоёр удаа ДАШТ-нд оролцож байсан бөгөөд Америкийн Үндэсний сагсан бөмбөгийн холбооны /NBA/ "Хьюстон Рокетс" багт 2002-2011 онд тоглож байжээ. Тэрбээр NBA-гийн Бүх оддын тоглолтод байнга оролцож байв. Яо Мин бол Хятадын хамгийн алдартай, баян хүмүүсийн нэг бөгөөд "Шанхай Шаркс" багийн эзэн юм. Одоо тэрбээр спортын тайлбарлагчийн ажил хийж байна.
Б.Адъяахүү
