Улаанбаатар
Гадаад харилцааны сайд, НҮБ-ын Хүний эрхийн дээд комиссар нар уулзав
МОНГОЛЫН МЭДЭЭ | УЛС ТӨР
Улаанбаатар, 2023 оны арванхоёрдугаар сарын 13 /МОНЦАМЭ/. Xүний эрхийн түгээмэл тунхаглал батлагдсаны 75 жилийн ойд зориулсан “Хүний эрх-75” дээд, өндөр түвшний арга хэмжээнд оролцож буй Гадаад харилцааны сайд Б.Батцэцэг НҮБ-ын Хүний эрхийн Дээд комиссар Волкер Түрктэй энэ сарын 12-нд уулзаж, хамтын ажиллагааны асуудлаар санал солилцов.
Гадаад харилцааны сайд Б.Батцэцэг дэлхий дахинд зөрчил мөргөлдөөн, талцал улам бүр газар авч, хүний эрхийн зөрчил нэмэгдэж, олон улсын энх тайван, аюулгүй байдалд шинэ тутам сорилт бэрхшээл тулгарч байгаа үед Хүний эрхийн түгээмэл тунхаглалын үзэл санааг сэргээн тунхаглахад чиглэсэн цаг үеэ олсон чухал арга хэмжээ санаачлан зохион байгуулж байгаад Хүний эрхийн Дээд комиссарт талархал илэрхийлж, Монгол Улсын Засгийн газраас танилцуулсан үүрэг амлалтыг бодит ажил хэрэг болгоход хамтран ажиллах эрмэлзэлтэй байгаагаа тэмдэглэв.
НҮБ-ын Хүний эрхийн Дээд комиссар Волкер Түрк тус арга хэмжээг дэмжин оролцож байгаад Монгол Улсын Засгийн газар болон Гадаад харилцааны сайд Б.Батцэцэгт талархал илэрхийлж, Гадаад харилцааны сайд жендэрийн тэгш байдлыг хангах чиглэлээр манлайлан ажиллаж ирсэнд сэтгэгдэл өндөр байгаагаа тэмдэглэн, Монгол Улсын Засгийн газраас дэвшүүлсэн үүрэг амлалтыг дэмжиж ажиллахаа илэрхийллээ.
