Ulaanbaatar
Энэ онд 2-6 насны хүүхдийн шүдийг эмчилнэ
МОНГОЛЫН МЭДЭЭ | ЭРҮҮЛ МЭНДУлаанбаатар /МОНЦАМЭ/. “Эрүүл шүд-Эрүүл хүүхэд” үндэсний хөтөлбөрийг улс орон даяар албан ёсоор өнөөдрөөс хэрэгжүүлж эхэллээ.
Хөтөлбөрийг 2019-2023 онд хэрэгжүүлж, 2-12 насны
хүүхдийн шүдийг эмчилж, эрүүлжүүлэн хүн амыг амны хөндийн эрүүл ахуйг сахих
дадал хэвшилд сургах, шүдний өвчлөлөөс урьдчилан сэргийлэх юм. Эхний ээлжинд
буюу энэ онд 2-6 насны хүүхдийг хөтөлбөрт хамруулах аж.
Хүүхдийн амны хөндийн эрүүл мэндийн урьдчилан сэргийлэх
үзлэг, эмчлэн эрүүлжүүлэх тусламж үйлчилгээг хувийн хэвшлийн шүдний эмнэлэг
үзүүлэх юм. Иймд Эрүүл мэндийн даатгалын ерөнхий газар эмнэлгүүдийг өнгөрсөн сарын 18-27-нд сонгон
шалгаруулж, 161 эмнэлэгтэй гэрээ
байгуулжээ. Нийслэлд сонгон шалгаруулалтад 142 шүдний эмнэлэг оролцож,
115 нь тэнцсэн бөгөөд үүнээс 97 нь гэрээ байгуулжээ. Харин орон нутгийн хувьд,
шалгаруулалтад 101 шүдний эмнэлэг материал ирүүлснээс 84 нь тэнцэж, үүнээс 64
нь гэрээ байгуулсан юм. Эдгээр эмнэлгийг сонгохдоо халдвар хамгааллыг гол
шалгуур үзүүлэлт болгосон байна. Хүүхдүүд гэрээ
байгуулсан эмнэлгээс сонгон, харьяалал харгалзахгүй үйлчлүүлэх боломжтой.
Сүүлийн жилүүдэд хүүхэд, ялангуяа 2-12 насныхны дунд шүд,
амны хөндийн өвчлөл ихэсжээ. 2016 онд нийслэлийн төвийн зургаан дүүргийн 3-5
настай хүүхдийн дунд хийсэн судалгаагаар, 92.9 хувь нь шүд цоорох өвчтэй байсан байна. Хүүхдийн шүдний цоорол чих, хамар хоолойн болон амь
насанд аюултай эрүү, нүүрний мэс заслын үрэвсэлт өвчний шууд, амьсгалын замын
өвчний суурь шалтгаан болж байна. Иймд
хүүхдийн шүдний тусламж, үйлчилгээний чанар, хүртээмжийг нэмэгдүүлэх,
санхүүгийн тогтвортой байдлыг хангаж, салбар хоорондын хамтын ажиллагааг
өргөжүүлэх, олон улсын дэвшилтэт арга туршлагыг нэвтрүүлэхийн тулд Эрүүл
мэндийн яам “Эрүүл шүд-Эрүүл хүүхэд” үндэсний хөтөлбөрийг боловсруулан Засгийн
газрын хуралдаанаар хэлэлцүүлэн 2018 оны наймдугаар сарын 15-нд батлуулсан юм.
