Ulaanbaatar
Зочид буудлуудын менежерүүдийг мэргэшүүлэх сургалт эхэллээ
МОНГОЛЫН МЭДЭЭАСЕМ-ын Байр зочид буудлын асуудал хариуцсан ажлын хэсэг, БОНХЯ, “КОЙКА” олон улсын хамтын ажиллагааны байгууллагаас хамтран АСЕМ-ын түнш зочид буудлуудын менежерүүдийг мэргэшүүлэх сургалтын нээлтийг өнөөдөр “Блю скай” зочид буудалд хийлээ.
Нээлтийн үйл ажиллагаанд Монгол Улсын Ерөнхийлөгчийн Тамгын газрын дарга, АСЕМ-ын Байр, зочид буудлын асуудал хариуцсан ажлын хэсгийн дарга П.Цагаан, ГХЯ-ны Төрийн нарийн бичгийн дарга, АСЕМ-ын Бэлтгэл ажлын албаны дарга Д.Ганхуяг, БОНХАЖЯ-ны Төрийн нарийн бичгийн дарга Ц.Цэнгэл, “КОЙКА” олон улсын хамтын ажиллагааны байгууллагын Монгол дахь суурин төлөөлөгч Пак Сү Ён нар оролцов.
Арга хэмжээг нээж Ерөнхийлөгчийн Тамгын газрын дарга, АСЕМ-ын Байр, зочид буудлын асуудал хариуцсан ажлын хэсгийн дарга П.Цагаан хэлсэн үгэндээ “АСЕМ-ын Дээд түвшний хурлыг амжилттай зохион байгуулах гол хүчин зүйл нь зочлох үйлчилгээний чанар юм. Тиймээс АСЕМ-ын Бэлтгэл ажлын албанаас түнш зочид буудлуудын үйлчилгээний чанарт ихээхэн анхаарч шат дараалалтай олон сургалт зохион байгуулж байгаа. Үүний хүрээнд олон улсын хурал зохион байгуулахад Монголын зочид буудлуудын чадавхийг бэхжүүлэх зорилготой энэхүү сургалтыг зохион байгуулж байгаад баяртай байна. Уг сургалт нь зөвхөн АСЕМ-ын түнш зочид буудлуудын чадавхийг бэхжүүлэхэд чиглэхээс гадна Монголын аялал жуулчлал, зочлох үйлчилгээний салбарын хөгжилд ихээхэн хувь нэмэр оруулна гэдэгт итгэлтэй байна” хэмээн онцоллоо.
Энэ удаагийн сургалтад АСЕМ-ын түнш зочид буудлуудын 150 гаруй менежер хамрагдаж, олон улсын хурал зохион байгуулах арга зүй, өндөр дээд хэмжээний зочид төлөөлөгчдөд үйлчлэх зохион байгуулалтад суралцаж, мэдлэг туршлагаа нэмэгдүүлэх аж.
Сургалтыг БНСУ-ын зочлох үйлчилгээний мэргэшсэн 5 багш удирдан явуулж байгаа бөгөөд сургалт энэ сарын 29 хүртэл үргэлжлэх юм байна.
Н.Туяа
