Ulaanbaatar
Алтны ханш 3.5 хувиар буурчээ
МОНГОЛЫН МЭДЭЭ | ЭДИЙН ЗАСАГ
Улаанбаатар /МОНЦАМЭ/. Дэлхий нийтийг хамраад буй "COVID-19"-ийн цар тахлын дэгдэлтэй холбоотойгоор зэсийн үнэ сүүлийн 4 жилд байгаагүй дүнгээр огцом унаж, өнгөрсөн 3 дугаар сард нэг тонн зэсийн үнэ 4609 ам.долларт хүрээд байв. Тэгвэл БНХАУ-ын хүнд үйлдвэрүүд үйл ажиллагаагаа сэргээж эхэлсэнтэй холбоотойгоор зэсийн ханш сүүлийн өдрүүдэд аажмаар сэргэж, 5500 ам.доллароос давж, энэ сарын байдлаар 6700 ам.долларт хүрээд байна.
Манай улсын уул уурхайн бүтээгдэхүүний экспортын мэдээллээр жоншны экспорт энэ оны эхний 8 сард жилийн өмнөхөөс 23.4 хувиар буурч, 101.2 сая ам.доллар болжээ. "COVID-19"-ийн цар тахлын нөлөөгөөр БНХАУ-д жоншны үнэ буурсан ч ОХУ-д жижиг үйлдвэрүүдийн үйл ажиллагаа хэвийн үргэлжилж буйтай холбоотойгоор жоншны үнэ буураагүй, жонш хүлээн авалт идэвхжиж байна. Үүнтэй холбоотойгоор жоншны үнэ өсөх хандлагатай байгааг жонш үйлдвэрлэгчдийн холбоо болон "Баялаг жонш" ХХК-иас мэдээлж байна.
Жоншны нийлүүлэлтээр олон улсад БНХАУ болон Мексикийн дараа 3-т ордог манай улсын жоншны экспортын 70 хувийг БНХАУ-д, 29 хувийг ОХУ-д гаргадаг. Энэ жил нэмж, БНСУ болон Узбекстан улс руу жонш нийлүүлжээ. Үүнээс гадна Японы хэрэглэгчид ОХУ-ын Владивосток боомтоор дамжуулан Монгол Улсаас жонш авах сонирхол ажиглагдаж байгаа аж.
Манай улсын экспортод металургийн бүхэллэг жонш гаргаж, дийлэнх хувийг эзэлдэг. Тэгвэл сүүлийн 2 жилд харин баяжуулсан буюу нэмүү өртөг шингэсэн жоншны экспорт өсөж иржээ.
Ташрамд мэдээлэхэд ам.долларын ханш чангарч, таваарын эрэлт буурснаар нэг унци алтны үнэ 1900 ам.доллароос доош унажээ. Өнгөрсөн даваа гарагийн байдлаар алтны үнэ 3.5 хувиар буурч, 1882.5 ам.доллар болоод байна. "COVID-19"-ийн нөлөөгөөр тогтоосон хөл хорио, хязгаарлалттай холбоотойгоор алтны үнэ огцом өсөөд байсан ч АНУ эдийн засгаа дэмжих нэмэлт арга хэмжээ авах эсэх нь тодорхойгүй байгаагаас ам.долларын ханш чангарч алтны үнэ унаад байгааг олон улсын шинжээчид тайлбарлаж байна.
