Улаанбаатар /МОНЦАМЭ/. Эрүүл мэндийн сайд Т.Мөнхсайхан, УИХ-ын гишүүн Х.Болорчулуун, ЭМЯ-ны эдийн засаг, санхүү, хөрөнгө оруулалтын газрын дарга Д.Нарантуяа болон бусад албаныхан Дорнод аймгийн Бүсийн оношилгоо, эмчилгээний төв болон өрхийн эмнэлгүүдийн ажилтай танилцлаа.

Энэ үеэр Эрүүл мэндийн сайд Төвлөрсөн ариутгалын тасгийн барилгын их засвар, тоног төхөөрөмжийн шинэчлэлтийг хүлээлгэн өгч, эрүүл мэндийн салбарын эмч, ажилтнуудтай уулзсан юм.

Эрүүл мэндийн сайд тус аймагт ажиллах үеэрээ шинээр ашиглалтад орж буй Халдвартын эмнэлгийн 20 орыг шинэчлэх, Бүсийн оношилгоо эмчилгээний төвийн үйл ажиллагааны цар хүрээг нэмэх, тусламж үйлчилгээг сайжруулах үүднээс хоёр тэрбум төгрөгийн өртөгтэй Ангиографи аппаратыг ирэх оны нэгдүгээр улиралд багтаан шийдвэрлэж өгөхөөр боллоо. Ингэснээр зүрх судас, мэдрэлийн гаралтай өвчлөлтэй хүмүүс орон нутагтаа цаг алдалгүй үйлчилгээ авах, УГТЭ рүү зорих шаардлагагүй болж тус эмнэлгийн ачааллыг хуваалцах, төвлөрлийг сааруулахад чухал ач холбогдолтой юм. Мөн нэн шаардлагатай гэгдэж буй унтуулгын болон амьсгалын аппарат, Хөлөнбуйр сумын эмнэлэгт автомашиныг тус тус хүлээлгэн өгөв. Түүнчлэн төрөх тасгийн мэс заслын өрөөний таазны гэрлийг шийдвэрлэж өгөхөөр болж, тус тасгийн хамт олон орон нутгийн иргэддээ тусламж, үйлчилгээ үзүүлэхэд маш сайн ажиллаж байсныг онцолж байлаа. 

Эрүүл мэндийн сайд Т.Мөнхсайхан, “Засгийн газраас эмнэлгийн тусламж, үйлчилгээний төвлөрлийг сааруулах, үйлчилгээг сайжруулахад нэлээн анхаарал хандуулж байгаа. Цаашид эрүүл мэндийн салбарын санхүүжилтийн тогтолцоонд өөрчлөлт орохоор эмнэлгийн тусламж, үйлчилгээний цар хүрээ нэмэгдэнэ. Орон нутгийн иргэд оршин суугаа газраасаа тусламж, үйлчилгээгээ авах нь төвөг чирэгдлийг багасгах төдийгүй санхүүгийн дарамтаас чөлөөлөгдөх юм. Тусламж, үйлчилгээний цар хүрээг нэмэгдүүлэхэд үйлчлүүлэгчийн аюулгүй байдал чухал. Дорнод аймгийн Бүсийн оношилгоо, эмчилгээний төвд Ариутгал, халдваргүйтгэлийн нэгдсэн тасаг цогцоороо шинэчлэгдэн, нээлтээ хийж байна. Энэ нь Азийн Хөгжлийн банкны “ЭМСХХ-5” төслийн хүрээнд  1.4 орчим тэрбум төгрөгийн санхүүжилтээр хийсэн. Нян судлалын лабораторитой. Ингээд Дорнод аймгийн Бүсийн оношилгоо, эмчилгээний төвд томоохон мэс засал хийхэд ариутгал талаас ямар ч хүндрэл бэрхшээлгүй болж байгаа юм. Цаашид бид үндэсний хэмжээний эмч, сувилагч нарын багийг бэлдэж, тухайн бүс нутгийн эмч, мэргэжилтнүүдийг ажлын байран дээр нь сургах, чадавхжуулах, тоног төхөөрөмжөөр хангах үе шаттай ажлуудыг хийнэ. Ингэхээр Дорнод аймгийн иргэд Улаанбаатар руу зорих шаардлагагүй болно. Улаанбаатар руу зорих хөдөлгөөнийг 80-90 хувь багасгах төлөвлөгөөтэй байгаа. Эрхтэн шилжүүлэн суулгах, зүрхний нээлттэй мэс засал гэх мэт нарийн мэс заслыг авах гэж л Улаанбаатарыг зорьдог, бусад тохиолдолд аймгийнхаа Бүсийн оношилгоо, эмчилгээний төвдөө эмчлүүлдэг болох зорилтыг дэвшүүлэн ажиллаж байна” гэлээ.