Ulaanbaatar
Нийслэлийн Наркологийн эмнэлгийн шинэ барилгын ажил удахгүй эхэлнэ
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Нийслэлийн Засаг даргын Нийгмийн хөгжил, боловсрол, эрүүл мэндийн асуудал хариуцсан орлогч З.Төмөртөмөө Нийслэлийн Наркологийн эмнэлгийн эмч, ажилтнуудтай уулзан тулгамдсан асуудлын талаар ярилцав.
Нийслэлийн Наркологийн эмнэлэг НЭМГ-ын харьяанд ажилладаг, архинд донтох эмгэгийн эмчилгээ, үйлчилгээ болон тамхинаас гаргах, мансууруулах болон сэтгэцэд идэвхт бодисын донтолтын эмчилгээг 23 дахь жилдээ хийж буй юм. Нийслэлийн хэмжээнд ганцхан байдаг энэ эмнэлэг 50 ортой, үйлчлүүлэгчдийн тоо жилээс жилд нэмэгдсээр байгаа ч 1963 онд цэцэрлэгийн зориулалтаар барьсан барилга нь хуучирч муудсанаас хүндрэл учирч буйг тус эмнэлгийн Эмчилгээ эрхэлсэн орлогч дарга Д.Чулуунболор хэлж байлаа.
Сард ойролцоогоор 164-192 хүн, жилд 1500-2500 хүнийг хэвтүүлэн эмчилдэг аж.
Хэвтэн эмчлүүлэгчдийн 92-96 хувь нь архинд донтсон хүмүүс байдаг ч цаашдаа эмнэлгийнхээ нэрийг шинэчлэхээс эхлээд хийх ажил маш их байгааг Эмчилгээ эрхэлсэн орлогч онцолж байлаа. Бусад улсад ийм төрлийн эмнэлгийг зан үйл, сэтгэл заслын төв гэж нэрлэдэг гэнэ. Түүнчлэн тус эмнэлэг одоогоор зөвхөн насанд хүрэгчдэд үйлчилдэг нь учир дутагдалтай байдаг аж. Хүчин чадал сайтай шинэ эмнэлэгтэй болчихвол хүүхдийн, эмэгтэйчүүдийн тасаг нээж ажиллуулах, нийслэлийн иргэдийг бүх төрлийн донтох эмгэгээс урьдчилан сэргийлэх, эмчлэх, сэргээн засах үйлчилгээг үзүүлэх шаардлагатай байгаа юм байна.
Нийслэлийн Засаг даргын орлогч З.Төмөртөмөө Нийслэлийн Наркологийн эмнэлгийн шинэ барилгын ажлыг яаравчлан эхлүүлнэ гэдгийг хэлсэн юм. Тэрбээр, “Алсдаа дүүрэг бүрд наркологийн чиглэлийн үйлчилгээг нэвтрүүлэх, эмч, ажилтнуудыг мэргэшүүлэх, хүн амыг элдэв төрлийн донтолтоос сэргийлэх мэргэжилтнийг нэмж бэлтгэх, гадаадын хөрөнгө оруулалт татах зэрэгт анхаарал хандуулна. Монгол Улсын Ерөнхийлөгч эрчүүдийн асуудлаар чуулган зохион байгуулж, уриалга гаргасан нь та бүхний үйлсэд ихээхэн тустай хэрэг болсон. Өөрөөр хэлбэл, нийгмийн эрүүл мэндийн салбарт тулгамдаж буй асуудлыг шийдэхэд дөхөм болохуйц “том малгай” тавигдсан гэсэн үг. Одоо хувийн хэвшил болоод ард иргэдийн дэмжлэгийг авахад анхаарч, тулгамдсан асуудлаа эрэмбэлэн, ажилдаа шамдан орох хэрэгтэй байна. Эмнэлгийн шинэ барилгын ажлыг тун удахгүй эхлүүлнэ” гэсэн юм.
Нийслэлийн Наркологийн эмнэлэг Баянгол дүүргийн 20 дугаар хороонд байрладаг бөгөөд одоо байрлаж буй цэцэрлэгийн барилгыг буулгаж, шинэ эмнэлгээ барих аж.
