Улаанбаатар хотын хүн амын эрүүл мэндийн судалгааг танилцуулав

МОНГОЛЫН МЭДЭЭ | ЭРҮҮЛ МЭНД
boloroo8136@gmail.com
2022-08-23 16:37:48

Улаанбаатар /МОНЦАМЭ/. Монгол, Япон Улс дипломат харилцаа тогтоосны 50 жилийн ойн хүрээнд Монгол Улсад айлчилж буй Япон улсын төлөөлөгчид НЗДТГ-т  өнөөдөр зочлов.

Энэ үеэр Нийслэлийн Бодлогын судалгаа шинжилгээний төвийн судлаачид Улаанбаатар хотын хүн амын дундах амьсгалын дээд замын болон зүрх судасны өвчлөлийн талаарх судалгааг танилцуулав. Уулзалтад Нийслэлийн Засаг дарга бөгөөд Улаанбаатар хотын Захирагч Д.Сумъяабазар, Монгол Улсын Ерөнхий сайдын зөвлөх Б.Баярсайхан, Нийслэлийн Бодлогын судалгаа шинжилгээний төвийн захирал Р.Дагва, Нийслэлийн Засаг даргын ахлах зөвлөх Д.Мөнх-Эрдэнэ, НЗДТГ-ын дарга И.Баатархүү нар оролцлоо.  

Уулзалтын үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Монгол, Япон Улс  дипломат харилцаа үүсэж хөгжсөний 50 жилийн ойн хүрээнд хувийн салбараас тэр дундаа эрүүл мэндийн салбараас хөрөнгө оруулалт хийх эмнэлгийн байгууллагын удирдлагын бүрэлдэхүүн хүрэлцэн ирсэн байна. Улаанбаатар хотын есөн дүүргийн ард иргэдийн өвчилж буй өвчлөлийн судалгааг та бүхэнд танилцуулж байна. Японы хувийн эмнэлгийн хамгийн том групп Токушүкай медикал группийн ерөнхийлөгч болоод хамтран ажиллаж буй та бүхэнд талархал илэрхийлье. Тус групп салбар эмнэлгээ манай Улаанбаатар хотод байгуулахаар шийдвэрлэж, Монгол Улсын Ерөнхий сайдтай өнөөдөр уулзсан. Энэ бол нийгмийн эрүүл мэндийн салбарт томоохон өөрчлөлтийг авчирна. Яагаад гэвэл зөвхөн тоног төхөөрөмж, барилга байгууламж биш боловсон хүчний бодлогоор дэмжиж, оношилгоо, эмчилгээ хийх баг бүрэлдэхүүнээрээ ирэх гэж байгаа нь хоёр улсын харилцаанд нэн шинэ үеийг авчрах юм” хэмээв.  


Улаанбаатар хотод жилд зүрх судасны өвчлөл ихсэж, илүүдэл жинтэй холбоотой асуудал зэрэг өвчлөл түгээмэл байна. Нөгөөтээгүүр хамрын хөндийн эрхтний буюу харшил, агаар орчны бохирдлоос үүссэн амьсгалын замын олон төрлийн шинэ өвчин гарч байна. 2015-2022 онд Улаанбаатар хотод 886.8 мянган хүн амьсгалын дээд замын өвчлөлд өртөж, тэднийг эмчлэхэд 345.2 тэрбум төгрөг зарцуулжээ. Амьсгалын дээд замын 23 төрлийн өвчлөл бүртгэгдсэнээс 10 төрлийн өвчин зонхилон гарч, нийт өвчлөгсдийн 74 хувийг эзэлж байгааг Нийслэлийн Бодлогын судалгаа, шинжилгээний төвийн Зөвлөлүүдийн нарийн бичгийн дарга М.Буяндэлгэр танилцуулгадаа онцолсон.

Улаанбаатар хотын хүн амыг эрүүлжүүлэхэд чиглэсэн энэхүү төслийг Улаанбаатар хотоос бүх талаар дэмжинэ гэдгээ илэрхийллээ.



相关新闻