Ulaanbaatar
ХХААХҮ-ийн сайд П.Сэргэлэн “Россия 24” телевизэд ярилцлага өгөв
МОНГОЛЫН МЭДЭЭ | НИЙГЭМ
Монгол Улсын Засгийн газрын гишүүн, ХХААХҮ-н сайд П.Сэргэлэн Оросын Холбооны Улсын Хөдөө аж ахуйн сайд А.Н.Ткачевын урилгаар 2016 оны 10 дугаар сарын 5-7-ны өдөр ОХУ-д айлчилж байна.
Айлчлалын хүрээнд Хүнс, хөдөө аж ахуй, хөнгөн үйлдвэрийн сайд П.Сэргэлэн, ОХУ-д Монгол улсаас суугаа Элчин сайд Б.Дэлгэрмаа нар 2016 оны 10 дугаар сарын 5-ны өдөр Москва хотноо болсон “Алтан намар-2016” Оросын хөдөө аж ахуйн үзэсгэлэнгийн нээлтийн ажиллагаанд оролцов. ОХУ-ын Ерөнхий сайд Д.А.Медведев үзэсгэлэнг нээж үг хэлэв.
Мөн өдөр Хүнс, хөдөө аж ахуй, хөнгөн үйлдвэрийн сайд П.Сэргэлэн ОХУ-ын Хөдөө аж ахуйн сайд А.Н.Ткачевтай албан ёсны уулзалт хийлээ. Уулзалтын үеэр хоёр улсын мал аж ахуй, газар тариалангийн салбарын хамтын ажиллагааг идэвхжүүлэх, харилцан туршлага солилцох, тэр дундаа Монгол малыг эрүүлжүүлэх хөтөлбөрийн хоёрдугаар шатны ажлыг хэрэгжүүлэх, Монголын хөрс, цаг уурын нөхцөлд зохицсон сайн чанарын үрийн сорт гаргах, ОХУ-руу Монголын мах, махан бүтээгдэхүүний нийлүүлэлтийг нэмэгдүүлэх, боловсон хүчин бэлтгэх чиглэлээр хамтран ажиллах асуудлаар санал солилцов.Тус уулзалтын үеэр Монгол ын талаас тавьсан бүх саналыг ОХУ бүрэн хүлээн авч байгаагаа илэрхийллээ. Уулзалтын төгсгөлд ХХААХҮ-ийн сайд П.Сэргэлэн ОХУ-ын Хөдөө аж ахуйн сайд А.Н.Ткачевыг Монгол Улсад таатай үедээ айлчлахыг урив. Тэрээр урилгыг хүндэтгэн хүлээн авч, ойрын үед Монгол Улсад айлчлахаа илэрхийлсэн.
Уулзалтын дараа П.Сэргэлэн сайд “Россия 24” олон нийтийн телевизэд хоёр улсын хөдөө ах ахуйн салбарын хамтын ажиллагааны талаар ярилцлага өгөв.
