Ulaanbaatar
ХӨВСГӨЛ: “Цаатан фестиваль-2025” өв соёлын наадам 7 дугаар сарын 6-7-нд болно
ОРОН НУТГИЙН МЭДЭЭ | ХӨВСГӨЛ
Мөрөн, 2025 оны зургаадугаар сарын 4 /МОНЦАМЭ/. Хөвсгөл аймаг халх, дархад, цаатан, урианхай, буриад, хотгойд зэрэг олон ястны өлгий нутаг.
Аймгийн аялал жуулчлалын цар хүрээг өргөтгөх, цаатан иргэдийн соёлыг дэлхий нийтэд таниулах, сурталчлах зорилгоор жил бүр уламжлал болгон зохион байгуулдаг "Цаатан фестиваль" өв соёлын наадам 7 дугаар сарын 6-7-нд болно.
Тус наадмыг Монголын хоймор нутагт өв уламжлалаа хадгалан амьдарч байгаа цаатан иргэдийн өвөрмөц аж амьдралын соёл, ёс заншил, дархад цаатан бөөгийн ёс заншлыг түгээн дэлгэрүүлэх, нутгийн иргэдийн амьжиргааны түвшнийг сайжруулах, орлогыг нэмэгдүүлэх зорилгоор 21 дэх жилдээ зохион байгуулна.
Энэ үеэр цааны уралдаан, цаатан иргэдийн амьдрал ахуйтай танилцах, зургаа авхуулах зэрэг олон боломж иргэдэд олддог онцлогтой.
Гадаад, дотоодын аялагч иргэд, жуулчид Хөвсгөл далайн эрэгт амарч аялангаа
цаатан иргэдийн аж амьдралыг үзэх төдийгүй олон сонирхолтой үйл ажиллагаанд
оролцох боломжтой юм.
Цаатан фестиваль "Монтрейвэл" компанийн Хөвсгөл далайн эрэгт байрлах жуулчны баазад болно.
Тус жуулчны бааз Улаанбаатар хотоос 900 км, Мөрөн хотоос 130 км зайтай Хөвсгөл нуурын хөвөөнд байрладаг.
Энэ үеэр жуулчид Хөвсгөл далайн эрэгт амарч аялангаа цаатан иргэдийн аж
амьдралыг үзэх төдийгүй олон сонирхолтой үйл ажиллагаанд оролцох боломжтой.
