Ulaanbaatar
“Хог шатааж эрчим хүч гаргах үйлдвэр” ашиглалтад орсноор 2300 өрхийг цахилгаанаар хангана
МОНГОЛЫН МЭДЭЭ | НИЙГЭМ
Улаанбаатар, 2025 оны арваннэгдүгээр сарын 3 /МОНЦАМЭ/. Нийслэлийн хүн амын төвлөрөл, бараа бүтээгдэхүүний үйлдвэрлэл, худалдаа үйлчилгээ жилээс жилд өргөжиж, иргэдийн орлого, хэрэглээ нэмэгдэхийн хэрээр хог хаягдал ихсэж, өдөрт 1500 гаруй тонн хог хаягдал ялгарч байна.
Энэ тал дээр ямар нэгэн шийдэлд хүрэхгүй бол 2040 он гэхэд хоногт 2915 тонн шатах хог хаягдал гарч, байгаль орчинд сөрөг нөлөө үзүүлэх урьдчилсан төлөв гарчээ. Иймээс төр, хувийн хэвшлийн түншлэлийн хүрээнд “Хог шатааж эрчим хүч гаргах үйлдвэр”-ийг нийслэлийн Хан-Уул дүүргийн 12 дугаар хороо, Морингийн давааны 10 га газарт барихаар болсон. Тус төслийн гүйцэтгэгчээр “Рэншоу Сычуань эрчим хүчний хөрөнгө оруулалт, байгаль орчныг хамгаалах” компани шалгарсан юм. Тус компани нь хог шатааж эрчим хүч гаргах 12 үйлдвэр барьсан туршлагатай аж.
“Хог шатааж эрчим хүч гаргах үйлдвэр” нь өдөрт 1500 тонн хог хаягдал шатааж, жилдээ 210 сая киловатт.цаг буюу 35 мегаваттын цахилгаан эрчим хүч үйлдвэрлэнэ. Энэ нь ойролцоогоор 2333 өрхийг цахилгаанаар хангах хэмжээний хүчин чадалтай юм байна. Төслийн нийт хөрөнгө оруулалт 206.5 сая ам.доллар бөгөөд бүтээн байгуулалтыг 30 сарын хугацаанд гүйцэтгэхээр төлөвлөжээ. Үйлдвэр ашиглалтад орсноор 86 байнгын ажлын байр, бүтээн байгуулалтын үед 300 гаруй түр ажлын байр бий болно гэж тооцоолов. Үйлдвэр 2028 онд ашиглалтад орсноор Улаанбаатар хотын нийт хог хаягдлын 31.8 хувийг шатааж устгах боломж бүрдэнэ. Үүнтэй зэрэгцэн төвлөрсөн хогийн цэгт булж буй хогийн хэмжээ буурч, хүлэмжийн хийн ялгарал жилийн 106 мянган тонн нүүрсхүчлийн хийгээр багасахыг мэргэжилтнүүд ярьж байна.
Технологийн хувьд олон улсын
стандартад нийцсэн, байгальд хор нөлөөгүй, утаа, үнсийг найман шатлалт
шүүлтүүрээр цэвэршүүлдэг “SNCR” хосолсон шүүлтүүрийн систем ашиглана. Хагас
хуурай, хуурай процесс, идэвхжүүлсэн нүүрс шахах болон уутан шүүлтүүрийн систем
нь утаа, тоосжилт, хорт бодисыг бүрэн шүүж, байгальд ээлтэй ажиллагааг хангах
юм.
