Канад Улс боловсролын солилцооны хөтөлбөр зарлалаа
МОНГОЛЫН МЭДЭЭ | БОЛОВСРОЛ
Улаанбаатар, 2026 оны нэгдүгээр сарын 30 /МОНЦАМЭ/. Канад Улсын Гадаад хэргийн яамнаас хэрэгжүүлдэг “Хөгжлийн төлөөх тэтгэлэг ба боловсролын солилцооны хөтөлбөр”-ийг зарлалаа.
Энэ жилээс эхлэн Энэтхэг-Номхон далайн бүс нутгийн орнуудаас Монгол Улсыг хамруулахаар шийдвэрлэсэн байна. Монгол Улсын оюутнууд НҮБ-ын “Тогтвортой хөгжлийн зорилтууд-2030”-ыг хэрэгжүүлэхэд хувь нэмэр оруулах чиглэлээр Канад Улсад богино хугацаагаар суралцах болон судалгаа хийх боломж бүрдэх юм. Тус хөтөлбөр нь ядуурлыг бууруулах, тогтвортой хөгжлийг дэмжих, Канад-Монголын иргэд хоорондын харилцаа, хамтын ажиллагааг бэхжүүлэх зорилготой.
Тэтгэлгийн хугацаа
- Бакалавр 4 сар /1 улирал/
- Бакалавр 8 сар /2 улирал/
- Магистр / Доктор- 4 сар /1 улирал/
- Магистр / Доктор 5-6 сар/
Тэтгэлэгт хамрагдах зардал
- Виз болон суралцах, ажиллах
зөвшөөрлийн төлбөр
- Хоёр талын нислэгийн тийз
- Эрүүл мэндийн даатгал
- Амьжиргааны зардал /байр, орон
сууц, хүнс/
- Нийтийн тээврийн зардал
- Ном, хичээлийн хэрэгсэл /компьютероос
бусад/
Тавигдах шалгуур
- Монгол Улсын иргэн байх /Канад
Улсын иргэншил болон байнгын оршин суух эрхгүй байх/
- Монгол Улсын их,
дээд сургуульд үндсэн ангид суралцаж буй оюутан байх
- Канад Улсын Засгийн газрын
бусад тэтгэлэгт хамрагдаагүй байх
Сонгон шалгаруулалт
- Монгол Улсын их, дээд сургууль
болон Канад Улсын хүлээн авагч сургууль хооронд хамтын ажиллагааны
гэрээтэй байх шаардлагатай.
- Тэтгэлгийн өргөдлийг оюутны нэрийн
өмнөөс Канад дахь хүлээн авагч сургууль гаргана.
- Канад дахь сургууль нь Канадын Гадаад хэргийн яаманд өргөдлийг 2026 оны гуравдугаар сарын 24-ний
өдрийн EDT 23:59 цагаас өмнө илгээсэн байна.
Тэтгэлэгт шалгарсан оюутнууд 2026 оны наймдугаар сарын 1-нээс 2027 оны 2 дугаар сарын 1 хүртэл Канад Улсад очсон байх шаардлагатай.
Дэлгэрэнгүй мэдээллийг EduCanada - SEED Scholarship холбоосоор авах боломжтой.
