МУГЖ Э.Лхагва-Очир Налайх дүүргийн "Хүндэт иргэн" боллоо
МОНГОЛЫН МЭДЭЭ | НИЙГЭМ
Улаанбаатар, 2026 оны хоёрдугаар сарын 10 /МОНЦАМЭ/. МУГЖ, уран нугараач Э.Лхагва-Очирыг Налайх дүүргийн 43 дахь “Хүндэт иргэн”-ээр өргөмжлөв.
Уран нугараач тэрбээр циркийн урлагт 27 дахь жилдээ ажиллаж, эх орныхоо нэрийг олон улсын тавцанд цуурайтуулж буй юм.
МУГЖ Э.Лхагва-Очир 1987 онд Налайх дүүрэгт төрж өсөн, есөн настайгаасаа Ардын жүжигчин, Төрийн соёрхолт Т.Цэнд-Аюуш багшийн гарын шавь болон уран нугаралт, тэнцвэрийн урлагаар хичээллэж эхэлсэн.
Мөн тэрбээр 30 орны 300 гаруй хотоор 10 мянга орчим тоглолтыг толилуулсан байна.
Түүний шагнал урамшууллаас дурдвал
- Монакогийн олон
улсын циркийн сургуулиудын 16 дахь удаагийн "Première Rampe"
тэмцээний хүрэл цомын эзэн
- ”Хюэ" олон
улсын соёлын наадмын тусгай шагналт
- Олон улсын
циркийн алтан цомын эзэн
- Итали, Лиана
Орфейн нэрэмжит олон улсын циркийн 29 дэх удаагийн мөнгөн цомын эзэн
- Франц, Гренобль, Овернь-Рона-Альп Изерийн циркийн 23 дахь удаагийн наадмын “Golden Star" шагнал
УИХ-ын гишүүн С.Амарсайхан, уран нугараач Э.Лхагва-Очир нар суралцаж төгссөн “Эрдмийн Оргил” цогцолбор сургуулийн хүүхэд багачуудтай уулзаж, халуун дотно яриа өрнүүлсэн юм.
