Ulaanbaatar
“Оюу Толгой” 2017 онд үйл ажиллагааны зардалд 720 сая ам. доллар зарцуулна
МОНГОЛЫН МЭДЭЭ
Оюутолгой компани гүний уурхайн анхны бүтээгдэхүүн 2020 оны дунд, эхний тогтвортой үйлдвэрлэл 2021 оны эхээр эхэлнэ хэмээн “Туркойз Хилл Ресурс” мэдэгдлээ.
“Туркойз Хилл Ресурс” 2017 оны үйлдвэрлэлийн болон санхүүгийн төлвөө гаргасан байна.
Ирэх онд “Оюу толгой” 130–160 мянган тонн баяжмал дахь зэс, 100–140 мянган унци баяжмал дахь алт үйлдвэрлэхээр төлөвлөжээ.
Түүнчлэн ил уурхайн үйл ажиллагааны хүрээнд уурхайн зургадугаар үе шатны хэсгийг олборлож, дөрөвдүгээр үе шатны хөрс хуулалтыг үргэлжлүүлэх юм байна.
Тодруулбал ил уурхайн дөрөвдүгээр үе шатны алтны өндөр агууламжтай хэсэгт 2018 оны дунд үеэр хүрэх төлөвлөгөөний дагуу 2016 онд энэ үе шатны олборлолтын төлөвлөгөөг 4А болон 4В хэмээн хоёр хэсэгт хуваажээ. Төлөвлөгөө ёсоор 2017 онд хийх хөрс хуулалт ил уурхайн дөрөвдүгээр шатны А хэсэгт төвлөрөх аж
2017 оны үйл ажиллагааны зардал ойролцоогоор 720 сая ам.доллар байх төлөв гарчээ. Энэ нь 2016 оны хүлээгдэж буй зардалтай харьцуулбал буурсан үзүүлэлт юм.
Ирэх оны бэлэн мөнгөний хөрөнгө оруулалтын зардал ил уурхайн үйл ажиллагааны хувьд ойролцоогоор 100 сая ам.доллар, гүний уурхайн бүтээн байгуулалтын хувьд 825-925 сая ам.доллар байх төлөв гарсан байна.
Б.Заяа
