Англи Улсын иргэн, өдгөө 27 настай, залуу эрдэмтэн Даниел Прайс “Туйлаас Парис руу” аяныг санаачлан хэрэгжүүлж байна. Залуу эрдэмтэн энэ өдрүүдэд Монгол Улсад ирээд байгаа ба өнөөдөр НҮБ-ын байранд болсон уур амьсгалын өөрчлөлтийн талаарх уулзалтад оролцож, аяныхаа талаар танилцууллаа.

Тэрбээр аяны хүрээнд Өмнөд туйлаас Парис хүрэх аялалаа 4 дүгээр сарын 21-нд эхлүүлж, уур амьсгалын өөрчлөлтөд олон нийтийн анхаарлыг хандуулахыг зорьж яваа юм байна.  Даниел Прайс аяныг эхлүүлэх болсон шалтгаанаа, “Улс төр, нийгмийн хүрээнд уур амьсгалын өөрчлөлтийн талаар авч хэлэлцэж байгаа хурд удаан байна гэж үзсэн тул аяныг санаачилж, дугуйгаар хийх аялалаа эхлүүлсэн” гэлээ. Одоогоор тэрбээр 7000 мянган км замыг туулжээ. Даниел өөрөө мөнгөө гаргаж, ивээн тэтгэгчээ олон явж байгаа. Монгол хүртэлх аялалыг өөрийн санаачилга, эрч хүчээр хийсэн, мөн цаашид ч амжилттай үргэлжлүүлнэ гэдэгт итгэлтэй байлаа. Энэ удаагийн аялал түүний хийсэн анхны том аялал бөгөөд аялалын явцад уур амьсгалын өөрчлөлтийн талаар олон хүнд мэдээ мэдээлэл түгээж, тэдгээр хүмүүс нь цааш дамжуулснаар бодох сэтгэхүйн түвшинд дэвшил гарна гэж үзэж байгаа аж.

Түүний аялал ирэх арванхоёрдугаар сарын 5-нд Парист өндөрлөнө. Парист хүрэх үед НҮБ-ын гишүүн орнуудын удирдагчид чуулсан Уур амьсгалын өөрчлөлтийн талаарх дээд хэмжээний уулзалт тус хотод болж, нүүрстөрөгчийн хийн хэмжээг багасгах, уур амьсгалын өөрчлөлтөд дасан зохицох буюу хөгжингүй орнууд хэрхэн хөгжиж буй орнуудад тусламж хүргэх талаар хэлэлцэж тохиролцох юм.  Тэр үеэр Даниел илтгэл тавих эсэх нь тодорхойгүй ч тэр талаар ярилцаж байгаа гэнэ.

Аяныг НҮБ-ын Хөгжлийн хөтөлбөр, Их Британийн ЭСЯ болон бусад байгууллагууд дэмжигчээр оролцож байгаа бөгөөд өнөөдөр болсон уулзалтыг БОНХАЖЯ, НҮБ-ын Хөгжлийн хөтөлбөр зэрэг байгууллагууд хамтран зохион байгууллаа. Энэ үеэр манай улсын судлаачид уур амьсгалын өөрчлөлтийн талаар илтгэл тавив. Ингэснээр манай улс түүний зохион байгуулж буй аяныг дэмжиж байгаагаа илэрхийлсэн хэрэг боллоо.

Даниел, Монгол Улс эрчим хүчнийхээ 80 хувийг нүүрснээс гаргаж авч байгааг сайн зүйл гэж үзэхгүй байна. Тиймээс асуудлыг шийдвэрлэхэд анхаарч, нар салхинаас эрчим хүч гарган авдаг технологийг хурдацтай хөгжүүлэх хэрэгтэй хэмээн зөвлөлөө. Дэлхийн түвшинд ч гэсэн хамгийн түрүүнд нүүрстөрөгчийн хийг багасгах шаардлагатай гэж үздэг тухайгаа ярьж байлаа. Хувь хүмүүс байгаль дэлхийгээ хамгаалахын тулд олон талын арга хэмжээнд идэвхтэй оролцдог ч хэрэглэгчийн түвшинд том өөрчлөлтийг хийхэд хэцүү тул улс орнуудын Засгийн газар  энэ тал дээр идэвхтэй ажиллах шаардлагатай гэж Даниел нэмж хэллээ. Англи судлаач ирэх мягмар гарагт манай улсаас хөдөлж, ОХУ-ыг зорино.

Б.Туул