Ачаалж байна…
Ачаалж байна…
Буянаа Ламжав

ХАМИЛТОН, 2026 оны арваннэгдүгээр сарын 19 /Anadolu/. АНУ-ын “Pew” судалгааны төвийн дэлхийн шашин шүтлэгийн ирээдүйн талаарх шинэ тооцооллоор 2035 он гэхэд мусульман шашинтнуудын тоо христийн шашинтнуудынхаас давах төлөвтэй байна.
Тус төвөөс 2020-2070 оны хооронд шашны долоон бүлгийн хүн амын өсөлтийг тооцоолсон бөгөөд христийн болон исламын шашинтнуудын тоо аль аль нь нэмэгдэх боловч мусульман шашинтнуудын өсөлт илүү хурдацтай байх төлөвтэй гарчээ.
Хэрэв хүн ам зүйн өнөөгийн хандлага үргэлжилбэл 2070 он гэхэд дэлхий даяар 3.6 тэрбум гаруй мусульман, гурван тэрбум орчим христийн шашинтан байх төлөвтэй байна.
Энэ хугацаанд дэлхийн нийт хүн ам 29 хувиар өсөхөөр тооцоолжээ. Харин христийн шашинтнуудын тоо 30 хувиар, мусульман шашинтнуудынх 80 хувиар нэмэгдэх бөгөөд эдгээр нь дэлхийн хүн амын өсөлттэй дүйцэх буюу түүнээс давах цорын ганц хоёр шашны бүлэг байх ажээ.
Тодруулбал, 2020 онд дэлхийн хүн амын 26 хувийг эзэлж байсан мусульман шашинтнуудын эзлэх хувь 2070 онд 36 хувьд хүрэх бол христийн шашинтнуудынх 29 орчим хувьд тогтвортой байх төлөвтэй гэж тайланд дурдсан байна.
“Pew” судалгааны төв энэхүү өөрчлөлтийг хүн ам зүйн хүчин зүйлстэй голчлон холбон тайлбарлажээ. Тухайлбал, 2020-2025 онд мусульман шашинтай нэг эмэгтэйд ногдох төрөлтийн дундаж тоо 3.1 байсан бол бусад шашны бүлгийнх 2.0 байжээ. Мөн 2020 онд мусульман шашинтнуудын голч нас 24 байсан нь бусад шашны бүлгийн 33 настай харьцуулахад бараг 10 жилээр залуу үзүүлэлт юм.
Энэ зуунд дэлхийн хүн амын өсөлтийн дийлэнх нь Сахарын цөлөөс өмнөх Африкийн орнуудад төвлөрөх бөгөөд тус бүс нутгийн хүн амын олонх нь христийн болон исламын шашин шүтдэг байна.
Тооцооллоор 2070 он гэхэд Пакистан дэлхийн хамгийн олон мусульман шашинтантай улс болж, араас нь Энэтхэг, Нигери, Индонез орно. Харин Бүгд Найрамдах Ардчилсан Конго Улс христийн шашинтнуудын тоогоор АНУ-ыг гүйцэх төлөвтэй байна.