Ачаалж байна…
Ачаалж байна…
Буянаа Ламжав

ХИРОШИМА, 2026 оны арваннэгдүгээр сарын 18 /Kyodo/. Японы Хирошима мужийн захиргаа 1945 оны атомын бөмбөгдөлтийг тэсэн үлдсэн, түүх, соёлын чухал өвд тооцогддог барилгын дээврийн 1000 орчим хавтанг иргэдэд үнэ төлбөргүй тараахаар болсныг мужийн захирагч мягмар гарагт мэдэгджээ.
Японы баруун нутагт орших тус мужийн захиргаа атомын бөмбөгдөлтөд өртсөн ч бүрэн сүйрээгүй хамгийн том барилгуудын нэг болох Хирошимагийн цэргийн хувцасны агуулахын гурван барилгад газар хөдлөлтөд тэсвэртэй байдлыг шалгах зэрэг аюулгүй байдлыг хангах ажлыг хийж байна. Энэ хүрээнд дахин ашиглах боломжгүй болсон дээврийн хавтангуудаас хадгалах боломжтойг нь хүсэлт гаргасан иргэдэд тараахаар шийдвэрлэжээ.
1914 онд баригдсан уг агуулах нь атомын бөмбөг дэлбэрсэн голомтоос 2.7 орчим километрийн зайд оршдог бөгөөд бөмбөгдөлтийн дараа түр эмнэлгийн зориулалтаар ашиглагдаж байжээ.
Мужийн захиргааны мэдээлснээр, дээврийн хавтангуудын ихэнх нь Японы баруун нутгийн Кикума хотод буюу одоогийн Имабари хотод үйлдвэрлэсэн, уламжлалт “кикумагавара” төрөлд хамаардаг байна.
Барилгын дээврийн нийт 140 мянга орчим хавтангаас 40 мянга орчмыг дахин ашиглах боломжтой гэж үзсэн бол үлдсэн хэсэг нь их хэмжээгээр гэмтжээ. Эдгээрээс дахин ашиглах боломжгүй ч харьцангуй сайн хадгалагдсан хавтангуудыг иргэдэд олгох юм.
Мужийн захиргаа арваннэгдүгээр сарын 24-нөөс Японд оршин суугчдын хүсэлтийг цахимаар хүлээн авч эхлэх бөгөөд нэг хүнд тав хүртэлх хавтан олгохоор төлөвлөжээ.
1945 оны наймдугаар сарын 6-нд АНУ-ын “Энола Гэй” бөмбөгдөгч онгоц Хирошима хотод атомын бөмбөг хаясны улмаас тухайн оны эцэс гэхэд 140 мянга орчим хүн амиа алдсан гэсэн тооцоо бий.