Ачаалж байна…
Ачаалж байна…
Montsame News Agency

Даланзадгад, 2026 оны арваннэгдүгээр сарын 13 /МОНЦАМЭ/. Монгол Улсын Ерөнхий сайд Н.Учрал Засгийн газрын болон Улсын Их Хурлын гишүүд, Өмнөговь аймгийн удирдлагуудын хамт “Эрдэнэс Тавантолгой” ХК-ийн үйл ажиллагаатай танилцаж, уурхайчидтай уулзлаа.
Тэрбээр нүүрс баяжуулах үйлдвэрийн үйл ажиллагаа, үйлдвэрлэлийн явц, хүчин чадалтай танилцсаны дараа уурхайн ажилчдын кемпэд очиж, уурхайчидтай уулзсан юм.
Уулзалтын үеэр Ерөнхий сайд “Эрдэнэс Тавантолгой” ХК 2026 онд төрд ногдох ногдол ашгийн өглөгөөс нэг их наяд төгрөгийг улсын төсөвт төвлөрүүлснийг онцолж, энэ нь уул уурхайн салбарын эдийн засагт оруулж буй бодит хувь нэмэр гэдгийг тэмдэглэв.
Энэхүү орлого нь татварын ачааллыг бууруулах, тэтгэвэр, цалин нэмэгдүүлэх, үнийн өсөлтийн эсрэг хэрэгжүүлэх бодлого, арга хэмжээг санхүүжүүлэхэд чухал ач холбогдолтойг тэмдэглэв.
Тэрбээр улсын төсөв, эдийн засагт бодит хувь нэмэр оруулж, хүнд нөхцөлд цаг наргүй хөдөлмөрлөж буй уурхайчдад талархал илэрхийлж, ажлын амжилт хүслээ.
“Эрдэнэс Тавантолгой” ХК компани 2026 оны эхний есөн сард 32,1 сая тонн нүүрс олборлож, 29 сая тонныг экспортолсон байна. Мөн энэ хугацаанд 1,5 их наяд төгрөгийн цэвэр ашигтай ажиллажээ.
Улс, орон нутгийн төсөвт эхний есөн сарын байдлаар 1,4 их наяд төгрөгийн татвар, төлбөр, хураамж төвлөрүүлсэн нь жилийн төлөвлөгөөний 133 хувьтай тэнцэж байна.
Түүнчлэн нэмүү өртөг шингэсэн бүтээгдэхүүн үйлдвэрлэх зорилготой нүүрс баяжуулах үйлдвэр 2025 онд бүрэн ашиглалтад орсон бөгөөд 2026 оны эхний 10 сарын байдлаар 4,4 сая тонн нүүрс баяжуулж, 76 хувийн гарцтайгаар 3,3 сая тонн бүтээгдэхүүн үйлдвэрлэжээ. Үйлдвэрийн эхний шат нь жилд 10 сая тонн нүүрс баяжуулах хүчин чадалтай юм.
Уулзалтын үеэр Ерөнхий сайд Засгийн газрын бодлого, үйл ажиллагааны чиглэл, цаг үеийн асуудлаар мэдээлэл өгч, байгалийн баялгийн өгөөжийг иргэдэд бодитоор хүртээх, төрийн өмчит компанийн үр ашгийг нэмэгдүүлэх, баялгийн сангийн хуримтлалыг өсгөх чиглэлээр хэрэгжүүлж буй ажлуудыг танилцууллаа.
Мөн “Эрдэнэс Тавантолгой” ХК-ийн 1072 хувьцааг иргэд өмчийн эзний хувиар захиран зарцуулах, өвлүүлэх, бэлэглэх, арилжих, худалдах эрхийг бодитоор нээх ажлыг үргэлжлүүлж байгааг мэдээлэв. Нэгж хувьцааны үнэлгээг одоогийн 936 төгрөгөөс 3000 төгрөгт хүргэх зорилт тавьж байгааг танилцуулсан юм.
Ингэснээр уул уурхайн салбарын өсөлт, компанийн ашигт ажиллагааг нэмэгдүүлэхийн зэрэгцээ байгалийн баялгийн үр өгөөжийг иргэдэд хүртээх, үндэсний баялгийн сангийн хуримтлалыг арвижуулах бодлогыг хэрэгжүүлэхэд анхаарч байгааг онцоллоо.