Ачаалж байна…
Ачаалж байна…
Буянаа Ламжав

НЬЮ-ЙОРК, 2026 оны арваннэгдүгээр сарын 20 /Kazinform/. Англи хэлний мэдлэг, чадварын түвшнийг тодорхойлдог жил тутмын “EF English Proficiency Index” (EF EPI) судалгаагаар Бельги улс 597 оноогоор өнгөрсөн жилийн адил есдүгээр байрт жагссан тухай Бельгийн Belga агентлаг мэдээлжээ.
Олон улсын хэлний сургалт, боловсролын хөтөлбөр хэрэгжүүлдэг “Education First” (EF) байгууллагаас гаргадаг уг судалгаанд дэлхийн 117 улс, бүс нутгийн 2.2 сая насанд хүрэгчийг хамруулсан байна. Судалгаанд оролцогчдын англи хэлээр унших, сонсож ойлгох, ярих, бичих чадварыг цахим шалгалтаар үнэлдэг бөгөөд энэ жил Бельгийн 7000 орчим иргэн шалгалт өгчээ.
Эхний аравт багтсан улсууд нь бүгд Европынх бөгөөд Швед 615 оноогоор тэргүүлж, Австри 613, Дани 612 оноогоор удаалсан байна. Харин өнгөрсөн онд тэргүүн байрт орсон Нидерланд улс энэ жил тавдугаар байр руу ухарчээ. Бельги улс 597 оноогоор есдүгээр байраа хадгалсан байна.
“EF” байгууллагаас лхагва гарагт танилцуулсан мэдээлэлдээ Бельгийн нидерланд хэлээр ярьдаг Фландр болон франц хэлээр ярьдаг Валлони бүс нутгийнхний англи хэлний мэдлэгийн түвшин ялгаатай байгааг онцолжээ.
Сүүлийн жилүүдэд Валлони бүс нутгийн иргэдийн англи хэлний мэдлэг сайжирч байгаа бол фландрчуудын хувьд уг үзүүлэлт аажмаар буурч байгаа аж. Гэсэн хэдий ч Фландр 639 оноогоор Валлонигийн 548 онооноос мэдэгдэхүйц өндөр хэвээр байна. Фландрын оноо өмнөх оныхоос 15-аар буурсан бол Валлонигийнх таван оноогоор өсжээ.
EF байгууллагын мэдээлснээр, Фландрын бүс нутаг англи хэлний мэдлэгийн түвшнээр дэлхийн бүс нутгуудаас хамгийн өндөр оноо авсан байна.