Ачаалж байна…
Ачаалж байна…
Чойжамц Отгонцэцэг

Сүхбаатар, 2026 оны арваннэгдүгээр сарын 20 /МОНЦАМЭ/. Алтанбулаг чөлөөт бүсийн захирагч Ж.Өнөрбаяр ОХУ-ын Эдийн засгийн хөгжлийн яамны Монгол Улс дахь төлөөлөгч В.Ю.Юрченко, тус байгууллагын эдийн засгийн атташе .В.Догдомэ нарыг хүлээн авч, хамтын ажиллагааны боломж, хөрөнгө оруулалтыг нэмэгдүүлэх асуудлаар уулзлаа.
Өчигдөр болсон энэхүү уулзалтаар Алтанбулаг чөлөөт бүсийн хөгжлийн цаашдын бодлого, төлөвлөгөө, хөтөлбөрийг танилцуулж, хөрөнгө оруулалтын орчныг сайжруулах, гадаадын хөрөнгө оруулагчдыг татах чиглэлээр санал солилцсон байна.
Түүнчлэн ОХУ-ын хөрөнгө оруулагчдыг Алтанбулаг чөлөөт бүсэд татан оролцуулах, хоёр улсын худалдаа, эдийн засгийн хамтын ажиллагааг өргөжүүлэх боломжийг хэлэлцжээ.
Мөн Монгол Улс болон Евроазийн эдийн засгийн холбоо (ЕАЭЗХ), түүний гишүүн орнуудын хооронд байгуулсан Түр худалдааны хэлэлцээрийн хүрээнд Монголын чөлөөт бүсэд үйл ажиллагаа эрхэлж буй хөрөнгө оруулагчдын экспортын боломжийг нэмэгдүүлэх, энэ чиглэлээр хамтарсан арга хэмжээ хэрэгжүүлэх талаар ярилцсан байна.
Уулзалтын дүнд талууд хөрөнгө оруулалт, экспортын үйл ажиллагааг дэмжих чиглэлээр хамтын ажиллагаагаа үргэлжлүүлж, ойрын хугацаанд дахин уулзан тодорхой санал, арга хэмжээг хэлэлцэхээр тохиролцжээ.