Ачаалж байна…
Ачаалж байна…
Montsame News Agency

ЛОНДОН, 2026 оны арваннэгдүгээр сарын 16 /TASS/. Хиймэл оюуны дэд бүтцийн салбарт хөрөнгө оруулах сонирхол буурсантай холбоотойгоор аж үйлдвэрлэл, эрчим хүч, уул уурхайн томоохон компаниудын зах зээлийн нийт үнэлгээ энэ оны зургаадугаар сараас хойш 4.2 их наяд орчим ам.доллароор буурсан тухай "Financial Times" сонинд мэдээлжээ. Тухайлбал, хийн цахилгаан үүсгүүр, хөргөлтийн систем, шилэн кабелийн сүлжээ зэрэг өгөгдлийн төвүүдэд зориулсан тоног төхөөрөмж нийлүүлэгч компаниудын үнэлгээ буурсан байна.
Тус сонины хийсэн дүн шинжилгээгээр, хиймэл оюуны салбар асар хурдацтай хөгжсөний нөлөөгөөр эдгээр компанийн зах зээлийн үнэлгээ өмнөх 12 сарын хугацаанд 9.4 их наяд ам.доллароор нэмэгдсэн байсан бол сүүлийн үеийн уналтаар уг хугацаанд нэмэгдсэн зах зээлийн үнэлгээний бараг тал хувь нь буцаад буурсан байна.
Тухайлбал, АНУ-ын “Caterpillar” компанийн зах зээлийн үнэлгээ зургаадугаар сарын 30-нд хүрсэн дээд түвшнээсээ 214 тэрбум ам.доллароор буурчээ. Мөн цөмийн эрчим хүчний “Oklo” компанийн хувьцааны үнэ нэгдүгээр сард “Meta” компанитай гэрээ байгуулсан хэдий ч 49 хувиар унасан бол унасан бол "Comfort Systems", "Corning" компаниудын үнэлгээ бараг тал хувиар буурсан байна.
Хөрөнгө оруулагчид хиймэл оюуны дэд бүтцэд оруулж буй хөрөнгө оруулалтын хэмжээ хэт их байгаад болгоомжилж эхэлсэн, мөн өгөгдлийн төвийн оператор компаниуд өсөн нэмэгдэж буй зардлаа нөхөж чадах эсэхэд эргэлзэж эхэлсэн нь хувьцааны үнэ унахад нөлөөлсөн байж магадгүй гэж шинжээчид дүгнэжээ.