Ачаалж байна…
Ачаалж байна…
Montsame News Agency

Өлгий, 2026 оны арваннэгдүгээр сарын 13 /МОНЦАМЭ/. Баян-Өлгий аймгийн Өлгий суманд “Хөгжлийн бэрхшээлтэй хүүхдийн хөгжил, хамгаалалд гэр бүл, нийгмийн хамтын оролцоо” сэдэвт хэлэлцүүлгийг Өлгий сумын Засаг даргын Тамгын газрын багийн нийгмийн ажилтнуудын санаачилгаар төрийн байгууллагууд хамтран зохион байгууллаа.
Хэлэлцүүлгийн зорилго нь хөгжлийн бэрхшээлтэй хүүхдийн эрхийг хангах, хөгжил, хамгаалал, боловсрол болон нийгмийн оролцоог дэмжих, эцэг эх, асран хамгаалагчдын мэдлэг, ойлголтыг нэмэгдүүлэх, туршлага солилцох, төрийн байгууллага, гэр бүлийн хамтын ажиллагааг бэхжүүлэхэд чиглэжээ.
Хэлэлцүүлгийн үеэр төрийн байгууллагын мэргэжилтнүүд хүүхдийн хөгжил, хамгаалал, боловсрол, эрүүл мэнд, нийгмийн халамжийн чиглэлээр үзүүлж буй үйлчилгээний талаар мэдээлэл өгч, эцэг эхчүүдийн санал хүсэлтийг сонсов. Мөн тулгамдаж буй асуудлыг шийдвэрлэх, цаашдын хамтын ажиллагааг өргөжүүлэх талаар санал солилцлоо.
Уулзалтад Өлгий сумын Засаг даргын Тамгын газрын дарга С.Жадыра, Эрүүл мэндийн газрын уламжлалт, сэргээн засах болон хөгжлийн бэрхшээлтэй хүний асуудал хариуцсан мэргэжилтэн З.Атина, Хөдөлмөр, халамжийн үйлчилгээний газрын ахмад настан, хөгжлийн бэрхшээлтэй иргэний асуудал хариуцсан мэргэжилтэн О.Айланыш, аймгийн Засаг даргын Тамгын газрын Нийгмийн бодлогын хэлтсийн мэргэжилтэн Б.Мадина нар оролцож, холбогдох чиглэлээр мэдээлэл хүргэн, эцэг эхчүүдийн асуултад хариуллаа.
Хэлэлцүүлэгт оролцогчид хөгжлийн бэрхшээлтэй хүүхэд бүр сурч боловсрох, хөгжих, хамгаалуулах, нийгмийн амьдралд тэгш оролцох эрхтэйг онцлов. Эдгээр эрхийг бодитой хангахад гэр бүл, төрийн байгууллага, олон нийтийн хамтын ажиллагаа, харилцан ойлголцол, дэмжлэг чухал болохыг тэмдэглэлээ.