Ulaanbaatar
Жүдо бөхийн насанд хүрэгчдийн улсын аварга шалгаруулах тэмцээн Сэлэнгэ аймагт болж байна
ОРОН НУТГИЙН МЭДЭЭ | СЭЛЭНГЭ
Сэлэнгэ /МОНЦАМЭ/. Монгол Улсын 2019 оны аварга шалгаруулах жүдо
бөхийн насанд хүрэгчдийн тэмцээн өнөөдөр буюу энэ сарын 7-ны өдөр Сэлэнгэ
аймгийн төв Сүхбаатар хотноо Биеийн тамир спортын ордонд эхэллээ.
Монгол Улсын спортын түүхэнд анхны Олимпийн аваргыг төрүүлсэн спорт бол
жү-до бөхийн спорт юм. Энэхүү спортыг аймаг орон нутагтаа хөгжүүлэх их үйлсэд
мэдлэг, ур чадвар, бүхий л амьдралаа зориулан хөдөлмөрлөсөн Монгол Улсын спортын
мастер, багш, сурган хүмүүжүүлэгч, ОХУ-ын Буриад Улсын
гавьяат дасгалжуулагч, “Алтан гадас” одонт Данзангийн Эрдэнэбатын нэрэмжит болгон явуулж буйгаараа
энэ удаагийн тэмцээн онцлогтой болж байна. Тэмцээнийг аймгийн ЗДТГ-ын дарга Ө.Сувдаа албан
ёсоор нээлээ. Энэхүү тэмцээн нь тив, Дэлхийн аварга шалгаруулах тэмцээн,
“Токио-2020” Олимпын их наадамд оролцох, Дэлхийн чансааны оноо олгох Гран-При,
Их дуулга зэрэг өндөр зэрэглэлийн тэмцээнүүдэд эх орноо төлөөлөн оролцох эрхийг
жүдочдод олгодгоороо тэмцээний чансааг
илтгэдэг байна. Тэмцээний хоймор Сэлэнгэ аймгийн жү-до бөхийн
холбооны тэргүүн Д.Бадрах, олимпийн хүрэл медальт МУГТ Р.Даваадалай, Самбо
бөхийн дэлхийн таван удаагийн
аварга, МУГТ Г.Жамсран, МЖБХ-ны Удирдах зөвлөлийн гишүүн, дэд ерөнхийлөгч н.Төмөрболд, Б.Одхүү, МЖБХ-ны ерөнхий нарийн бичгийн дарга М.Бөхбат,
Үндэсний шигшээ багийн ахлах дасгалжуулагч, Монгол Улсын Хөдөлмөрийн
баатар, Ардын багш, Гавьяат дасгалжуулагч Л.Балжинням, Монгол Улсын Хөдөлмөрийн
баатар, Ардын багш, Гавьяат дасгалжуулагч Ч.Насантогтох, ТЕГ-ын “Эрч” спорт
хорооны дарга, Монгол Улсын Хөдөлмөрийн баатар, гавьяат тамирчин Х.Цагаанбаатар, Олимпийн хүрэл
медальт, гавьяат тамирчин н.Нармандах
нарын хүмүүс тухлан саатжээ. Нээлтийн арга хэмжээний үеэр Д.Эрдэнэбат багшид
Монголын жү-до бөхийн холбооноос “Хүндэт өргөмжлөл”-ийг гардуулан өглөө. Мөн Сэлэнгэ аймгийн БТСГ болон ах дүүс, үе үеийн шавь нар,
найз нөхөд, уяачдын зүгээс мөн хүндэтгэл үзүүллээ.
Тэмцээн энэ сарын 7, 8, 9-ний өдрүүдэд
үргэлжлэн явагдах бөгөөд тэмцээний эхний өдөр эмэгтэй 48,
52, 57, 63, эрэгтэй 60, 66, 73 жингийн аваргууд тодорлоо. Тэмцээн маргааш үргэлжлэн
явагдана.
