Улаанбаатар /МОНЦАМЭ/. Монголын дугуйчид Азийн аварга шалгаруулах тэмцээнээс алтан медаль хүртсэн амжилттайгаар 60 жилийнхээ ойг угтаж байна.

Анх 1959 оны есдүгээр сард байгуулагдаж, анхны эмблем, тамга тэмдгээ гардаж 1960 оны долдугаар сард дэлхийн унадаг дугуйчдын холбоонд элссэн түүхтэй. Энэхүү байгууллага нь өдгөө 42 баг, клубийн улсын зэрэг цолтой нийт 350 гаруй тамирчинтай, Ази, Европ тив дэлхийн уралдаан тэмцээнээс нийт 600 орчим алт, мөнгө, хүрэл медалийг хүртээд байгаа юм. 

Монгол Улсад дугуйн спорт үүсгэн хөгжүүлсний 60 жилийн ойн хүндэтгэлийн ёслолын үеэр Монголын дугуйн холбооны ерөнхийлөгч П.Ганхүү: “Олон улсад үзүүлсэн амжилтаараа ТОП 6-д багтах болсон Монголын ууган спортын энэ төрлийг цаашид улам хөгжүүлэхийн төлөө Монгол Улсын Засгийн газраас дэвшүүлсэн хүн амын эрүүл мэнд, биеийн тамир спортыг хөгжүүлэх үндэсний хөтөлбөрийн хүрээнд Монголын дугуйн холбоо 2017-2020 оны бодлого, зорилт тавьж ажиллалаа. Сүүлийн хоёр жилийн хугацаанд мэргэжлийн дугуйн спортыг хөгжүүлэх хүрээнд дотоодын чанартай нийт 50 орчим уралдаан зохион байгуулж, гадаадын 20 гаруй тэмцээнд тамирчдаа оролцуулсан. Манай тамирчид дугуйн спортын төрөлд амжилт гаргасаар байна. Хамгийн чухал нь ханан тойргийн уралдааны төрлийн спортын цогцолбор, Туул гол дагасан зам барих зэрэг дэд бүтцийн асуудлыг шийдэх шаардлагатай, үүнд бид анхаарч байна. Мөн материаллаг баазыг нь хангаж, мэргэжлийн шигшээ баг бүрдүүлэх нь бидний чухал зорилгын нэг юм” гэлээ. Монголын дугуйн холбооноос байгаль орчинд ээлтэй унадаг дугуйн хэрэглээг олон нийтэд сурталчилж, нийтийн биеийн тамирыг хөгжүүлэх үүднээс Дугуйн парад зэргийг улсын хэмжээнд зохион байгуулснаар сонирхогчдын тоо жил бүр нэмэгдэж байгааг мөн онцлоод 1964, 1980, 1992, 1996 олимпод оролцож байсан амжилтуудыг түүчээлж цаашид тус наадамд оролцох эрх авахын төлөө тамирчдаа дэмжин, тэмцээн уралдаанд оролцох боломжоор хангана" гэдгийг тодотгов.

Тус холбооноос сүүлийн хоёр жилд олон улс, тив дэлхийн уралдаан тэмцээнд оролцож буй тамирчдаа дэмжин ажилласны үр дүнд багагүй амжилт гаргасан байна. Тухайлбал, 2018 онд Азийн аварга шалгаруулах тэмцээний Засмал замын дугуйн Under-23 ангиллын бөөн гараат уралдаанаас ОУХМ С.Жамбалжамц, Track дугуйн Азийн аварга шалгаруулах тэмцээний насанд хүрэгчдийн ангиллын төрлөөс ОУХМ Б.Тэгшбаяр нар хүрэл медаль хүртсэн нь Монгол Улсын түүхэнд анхдагч болж бичигджээ.

Мөн ОУХМ Т.Пүрэвдорж Ази, Номхон далайн орнуудын мастеруудын анхны наадмын 60, 70 насны ангиллын тэмцээний хошой алтан медаль, ОУХМ С.Түмэндэмбэрэл, ОУХМ Х.Пүрэвсүрэн нар Засмал замын дугуйн 2018 оны Мастеруудын Азийн АШТ-ээс тус бүр хүрэл медаль хүртсэн нь салбарын түүхэнд шинэ хуудас нээсэн үйл явдал болсон юм.

Дугуйн спортын олон улсын хэмжээний мастер Б.Тэгшбаяр: “Миний хувьд дугуйн спортоор 2013 оноос хойш Олон улсын хэмжээний мастер С.Төмөрхуяг дасгалжуулагчийн удирдлага дор хичээллэж ирсэн. Анх 2016 онд Швейцар улсад зохиогдож байсан Дугуйн тойрог замын залуучуудын Дэлхийн аварга шалгаруулах тэмцээнд бөөн гараат төрөлд амжилттай оролцож Залуучуудын дэлхийн аварга болж байсан. Энэ жилийн тухайд гэвэл 2019 онд Индонез улсын Жакарта хотод зохиогдсон Ази тивийн аварга шалгаруулах тэмцээнээс мөнгөн медаль авсан. Түүнээс гадна БНХАУ зохиогдсон олон улсын А зэрэглэлийн тэмцээнүүдэд оролцож эхний гурван байрт орсон. Цаашид дугуйн спортыг эх орондоо хөгжүүлэхийн төлөө илүү сайн хичээх болно. Мөн залуусыг энэ спортоор хичээллэхийг уриалж байна” гэлээ.

Монголын дугуйн холбооны түүхт 60 жилийн ойд дугуйн спортын эхлэлийг тавьсан, дэлхийн хэмжээний уралдаанд эх орныхоо нэрийг анхлан дуудуулсан гавьяат дугуйчин Цэвгээгийн Даржаагаас эхлээд үе үеийн тамирчид, дасгалжуулагчид хүрэлцэн ирсэн байлаа.