Ulaanbaatar
Сагсан бөмбөгчид эхний өдөр 2 хожилтой хэсгээ тэргүүлж байна
МОНГОЛЫН МЭДЭЭ | СПОРТ
Улаанбаатар /МОНЦАМЭ/. Австри улсын Грац хотноо болох “Токио-2020” олимпын эрх олгох ФИБА 3х3 сагсан бөмбөгийн сүүлийн тэмцээн эхний өдөр манай эрэгтэй баг тамирчид Польш, Туркийн шигшээг хожиж хэсгээ тэргүүлж эхэллээ.
Монгол Улсын эрэгтэй шигшээ баг энэ
сарын 26-30-нд үргэлжлэх тус тэмцээний А хэсэгт Польш, Бразил, Турк, Чехийн
шигшээ багуудтай өрсөлдөхөөр оноолт таарсан.
Тоглолтын хуваарийн дагуу 5 дугаар сарын 26-27-нд шилжих шөнө 01 цаг 30 минутаас Монгол Улсын үндэсний шигшээ баг, Польшийн багтай гарааны тоглолтоо хийж 22:18 гэсэн оноогоор эхний ялалтаа байгуулсан юм.
Харин шөнийн 03.35 цагаас Монголын шигшээ баг Туркийн багтай тоглож 21:13-аар хожиж, манай баг 2 хожилтой хэсгээ тэргүүлж эхэллээ.
Монголын баг өнөөдөр буюу 5 дугаар сарын 28-29-нд шилжих шөнө 01 цаг 30 минутаас Чех, 03.35 цагаас Бразил улсын /05.29/ шигшээтэй тус тус халз тоглох юм.
Ийнхүү “Токио-2020” олимпын эрх олгох
тэмцээний эхний өдөр Монголын эрэгтэй шигшээ баг 2 хожил байгуулж, 43 оноотой А хэсгээ
тэргүүлж байна
Энэхүү тэмцээнийг MNBA SPORTS суваг шууд дамжуулж байна.
