Ulaanbaatar
Монголчууд Уругвай улсад визгүй зорчихоор болов
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Дорнын бүгд найрамдах Уругвай Улсын Гадаад харилцааны дэд сайд Ариель Бергамино Монгол Улсад хийж буй айлчлалынхаа хүрээнд өнөөдөр Монгол Улсын Гадаад харилцааны дэд сайд Б.Батцэцэгтэй хэлэлцээр хийж, Санамж бичигт гарын үсэг зурлаа. Ингэснээр дипломат, албан болон энгийн паспорттой Монгол Улсын иргэд Уругвай улсад визгүй зорчих нөхцөл бүрдэж байна.
"Монгол Улсын Засгийн газар 2016-2020 оны үйл ажиллагааны хөтөлбөр"-т Гадаад худалдааг эдийн засгийн өсөлт, хүн амын эрэлт хэрэгцээг хангахад чиглүүлэн үр ашгийг нь дээшлүүлж, аялал жуулчлалыг хөгжүүлэх зорилгоор иргэд зорчих нөхцөлийг сайжруулах, олон улс, бүс нутгийн худалдаа, эдийн засгийн интеграци болон дэд бүтцийн сүлжээнд хамрагдах үйл явцыг эрчимжүүлж, гадаад худалдааны тааламжтай нөхцлийг бүрдүүлэх юм. Гадаад харилцааны яам Монгол иргэдээ, тухайлан энгийн паспорт эзэмшигч иргэдийг гадаад улсад аль болох хөнгөлөлттэй нөхцлөөр зорчих боломжийг бий болгохоор ажиллаж байгаагийн үр дүнд "Дипломат, албан болон энгийн паспорт эзэмшигчдийг визийн шаардлагаас чөлөөлөх тухай Монгол Улс болон Дорнын бүгд найрамдах Уругвай улс хоорондын хэлэлцээр"-т өнөөдөр гарын үсэг зурлаа. Хэлэлцээрийг хоёр улсын Засгийн газар баталснаар хүчин төгөлдөр үйлчлэх юм.
Мөн айлчлалын хүрээнд Хамтын ажиллагааны тухай Монгол Улсын Гадаад харилцааны яам, Дорнын Бүгд Найрамдах Уругвай Улсын Гадаад хэргийн яам хоорондын харилцан ойлголцлын санамж бичигт гарын үсэг зурсан юм. Энэхүү харилцан ойлголцлын санамж бичигт талууд хоорондын улс төр, эдийн засаг, соёл болон бусад салбарын хамтын ажиллагааг хөхиүлэн дэмжих, талуудын ашиг сонирхолд нийцсэн бүс нутгийн болон олон улсын асуудлыг хэлэлцэх зорилгоор хоёр жилд нэг удаа зөвлөлдөх уулзалтыг зохион байгуулах асуудлыг тусгажээ.
Гарын үсэг зурах ёслолын дараа Гадаад харилцааны дэд сайд Б.Батцэцэг "Уругвай улс манай улстай маш олон талаараа ижил төстэй. Орон зай, газар байршлын хувьд маш хол боловч манайх шиг 3 сая гаруй хүн амтай. Хөдөө аж ахуйн орон. Манай улс Уругвай улсаас маш олон туршлага судалж, хамтарч ажиллах боломжтой. Тус улсын дэд сайд манай улсад айлчлал хийж байгаа нь чухал үйл явдал юм" гэв.
Уругвай улсын Гадаад харилцааны дэд сайд Ариель Бергамино "Монгол Улс Уругвай улстай дипломат харилцаа тогтоогоод 20 жил болж байна. Энэ ойн хүрээнд бид айлчлал хийж, тодорхой асуудлуудаар хэлэлцээр хийлээ. Хэлэлцээрийн хүрээнд хоёр орны харилцаа цаашид улам өргөжин хөгжинө гэдэгт итгэлтэй байна. Өнөөдрийн уулзалтаар зөвлөлдөх механизмын болон визийн хэлэлцээр гэсэн хоёр хэлэлцээрт гарын үсэг зурсан. Цаашид олон салбарт хамтарна. Жишээ нь, сэргээгдэх эрчим хүч, хөрөнгө оруулалт, аялал жуулчлал, спорт гээд олон талаар харилцаагаа хөгжүүлэхээр болсон. Өнгөрсөн хугацаанд хоёр улс нэг нэгнээ дэмжиж ирсэн. НҮБ-ын хүрээнд хоёр орон хоёулаа энхийг сахиулах ажиллагаанд цэргээ илгээдэг. Энэ хүрээнд хамтран ажиллах боломжтой. Газар зүйн хувьд алслагдмал хол ч гэлээ түүх соёл гээд олон ижил төстэй зүйл бий. Энэ удаагийн айлчлал маань цаашид хамтарч ажиллахад чухал ач холбогдол болж байна. Сайхан ирээдүйн төлөө өнөөдрөөс хамтрах хэрэгтэй" гэлээ.
Дашрамд дуулгахад, Уругвай улс нь Монгол Улстай бүх төрлийн паспорт эзэмшигчдийг визээс чөлөөлөх хэлэлцээр байгуулсан Өмнөд Америкийн гурав дахь улс болох юм.
Н.Гантуяа
