Ulaanbaatar
Хулгайгаар өвчтэй малын мах оруулж байсныг илрүүлжээ
ОРОН НУТГИЙН МЭДЭЭ | ХОВД
Ховд аймгийн ихэнх сумдад бог малын Мялзан төст өвчин гарч энэ сарын 13-наас эхлэн 10 хоногийн өндөржүүлсэн бэлэн байдал зарлан малын шилжилт хөдөлгөөнийг хязгаарлаж хорио цээрийн дэглэм тогтоогоод байгаа юм.
Өндөржүүлсэн бэлэн байдал зарласантай холбоотойгоор Мялзан өвчний голомтод газруудад 44 пост шинээр гарган ажиллаж байгаас Аймгийн төв Жаргалант сумын хэмжээнд 6 пост ажиллуулж малын гаралтай түүхий эд болон мах, сүү цагаан идээ, аргал өвс зэрэг бүтээгдэхүүнийг голомттой бүсээс оруулж ирэхийг хориглосон.
Гэтэл аймгийн төврүү сэжигтэй мах оруулж ирлээ гэх дуудлагаар Аймгийн засаг даргын орлогч Батсүхээр ахлуулсан ажлын хэсэг газар дээр нь очиж нөхцөл байдалтай танилцжээ. Тодруулбал, ХОА 54-68 дугаартай автомашин Дуут сумын 3-р постоор Баян-Өлгий аймгийн Толбо сумаас их хэмжээний мах тээвэрлэж, аймгийн төврүү хулгайн замаар нэвтрэх гэж байсныг постонд ажиллаж буй мэргэжлийн байгууллагынхан саатуулсан байна.
Шалгаж үзэхэд гарал үүслийн ямарч бичиггүй туранхай малын мах байснаас гадна муудсан байсан бөгөөд уг мах нь Мялзан өвчнөөр өвчилсөн малын мах байж болзошгүй гэж үзэж байна. Бог малын мялзан төст өвчин нь зэргэлдээх Баян-Өлгий аймгийн зарим сумдад мөн гарсан. Үүнтэй холбоотойгоор уг хэрэг нь аймаг дамнасан зөрчилтэй хэрэг болж байгааг онцлоод, аймаг орон нутгийн зүгээс арга хэмжээг авч, улсын онцгой комисст мэдэгдэх болно гэдгийг холбогдох албаны хүн хэлж байна.
Постонд ажиллаж буй хяналтынхан хариуцлагатай ажилласны үр дүнд ард иргэдийг чанаргүй, өвчтэй байх магадлалтай мах хэрэглэхээс сэргийлж чадсан байна. Энэ мэтчилэн башир аргаар ашиг хонжоо олох гэсэн зарим нэгэн нь чанаргүй мах оруулж ирэн ард иргэдэд нийлүүлж болзошгүй учраас иргэд ч мөн сонор сэрэмж, анхаарал хяналтаа сайжруулах шаардлагатай байна. Иймээс эрүүл бүсээс оруулж ирсэн, гарал үүслийн бичигтэй, зөвшөөрөгдсөн газраас мал, махаа худалдан авч хүнсэндээ хэрэглэх нь чухал юм.
А.Бямбасүрэн
