Ulaanbaatar
Олон түвшний уулзварыг 18 байршилд барина
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 4 /МОНЦАМЭ/. Улаанбаатар хотыг хөгжүүлэх 24 мега төслийн хүрээнд олон түвшний уулзварыг нийслэлийн 18 байршилд барина.
Тодруулбал, Баруун 4 зам, Саппоро, Механик инженерийн
сургууль, Төв шуудан, Гэсэр сүм, Баянбүрд, 32-ын тойрог, 17 дугаар сургуулийн
уулзвар, Гадаад харилцааны яам,
Төв шуудан, Зүүн 4 зам, Их монгол зэрэг байршилд олон түвшний уулзвар 9000 метр
авто зам, 4500 метр нүхэн гарц барихаар төлөвлөөд байна. Төслийг хэрэгжүүлснээр замын хөдөлгөөний
дундаж хурд 7.1 хувиар нэмэгдэнэ. 2025-2028 он хүртэл төслийг гүйцэтгэхээр төлөвлөөд байгаа аж.
Олон түвшний уулзвар нь Улаанбаатар хотын төвийн бүсийн авто
замын ачааллыг бууруулж, замын хөдөлгөөний үр ашгийг дээшлүүлэх, эдийн засгийн
өсөлтийг дэмжих, иргэдийн цаг хугацааг хэмнэх, орчин үеийн стандарт бүхий авто
замын сүлжээг хөгжүүлэх ач холбогдолтойг НЗДТГ-ын ХМОНХХ мэдээлжээ.
