Зуунмод, 2025 оны аравдугаар сарын 24 /МОНЦАМЭ/. Тухайн байгууллагадаа 5-аас дээш жил тогтвортой ажиллаж, сүүлийн 3 жил дараалан гүйцэтгэлийн үнэлгээ болон заасан хичээлийн сургалтын чанараар тэргүүлэн ипотекийн зээлийн урьдчилгаа болох 30 сая төгрөгөөр шагнуулсан Сэргэлэн сумын "Алтантүлхүүр" цэцэрлэгийн багш Ч.Мөнхнямтай ярилцлаа.

-"Алтантүлхүүр" цэцэрлэгт анх ажилд орохдоо тогоочоор орж байсан гэсэн. Хэдий үеэс багш болохоор шийдсэн бэ?

-Анх 2011 онд тогоочоор ажилд ороод хүүхдүүдтэй ажиллах сайхан санагдсан. Ингээд 2013 онд бүлгийн багшаар ажиллаж эхэлсэн. Мэдэхгүй чадахгүй зүйл их байсан учраас өөрийгөө сурч хөгжүүлэх боломжийг эрж хайж ажиллахын зэрэгцээ МУБИС-д суралцаж 2016 онд төгссөн. Анх хүүхдүүдтэй ажиллахдаа өөрийгөө чадах эсэхэд эргэлзэж их айдаг байсан.

Гэсэн хэдий ч энэхүү мэргэжлийг сонгож өнөөгийн өөрийгөө бүтээсэндээ бахархдаг.

-Орчин үед хүүхдүүдийн өсөлт хөгжил, сэтгэн бодох чадвар гээд их зүйл өөр болж байгаа байх?

-Тийм ээ. Орчин үеийн хүүхдүүд ухаалаг тоног төхөөрөмжтэй харилцах чадвар маш сайн. Иймд бид хоцрохгүй байх, нэг алхам урд нь алхахын тулд өдөр бүр шинэ зүйлсийг туршиж хэрэгжүүлж, суралцаж байна. Өглөө эртлэн очиж хүүхдүүдээ угтаж авахдаа бэлдэж, 10 цаг ажлаа хийхдээ маргааш суралцах ёстой зүйлсээ эрж хайсаар байдаг.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                    

-Хүүхдүүдэд ямар хүмүүжлийг төлөвшүүлэхийг зорьдог вэ? Эцэг эхчүүд багштай хамтран ажиллаж байна уу?

-Хүүхдийг өөртөө үйлчлэх чадвар, биеэ зөв авч явах ухаанд сургахыг хичээдэг. Эцэг эхчүүд багштай ойр харилцаж орой бүр хүүхдээ авахдаа үүрэг даалгавар авч давтаж, сургахыг захиж хэлдэг. Маргааш нь харахад хэний эцэг, эх хүүхэдтэйгээ ажилласан нь мэдэгддэг. Ер нь эцэг эх дэмжиж байж аливаа зүйлсийг хүүхдүүд илүү хурдтай суралцдаг.

-Сүүлийн 3 жил дараалан гүйцэтгэлийн үнэлгээ болон заасан хичээлийн сургалтын чанараар тэргүүлсэн байна. Сургалтдаа ямар арга ашигладаг вэ? 

-Хүүхэд бүр өөрийн гэсэн сурах арга барилтай. Иймд хүүхэд нэг бүрийг цээжилж, тогтоох аргыг нэмэгдүүлэх зорилгоор аливаа зүйлсийн үзүүлэн таниулах материалыг хангалттай их бэлтгэдэг. Мөн төсөөлөн бодох чадварыг нэмэгдүүлж, гар урлалаар түүнийгээ бүтээх чадамжид суралцаж байдаг. Мэдээж өдөр тутамдаа нас насны онцлогт тохирсон чадварт суралцаж байна. 

-Суманд ажиллахын давуу тал?

-Би нөхөр, дөрвөн хүүхдийн хамт Сэргэлэн сумандаа амьдардаг. Анх Улаанбаатар хотод ажиллах бодолтой байсан хэдий ч сумандаа ажиллах нь илүү амгалан тайван юм байна гэж мэдэрсэн. Хааяадаа хот руу ажлаар ороход л бүтэн нэг өдрийг алддаг. Сумандаа бол цаг хугацаагаа алдахгүй сайхан байдаг. Цэвэр агаартай учраас үр хүүхдийнхээ эрүүл мэндэд ч санаа зовних шаардлагагүй.

-Ипотекийн зээлийн урьдчилгаа 30 сая төгрөгийг авах тухай мэдээг та яаж хүлээн авсан бэ?

-Итгээгүй, сонин жингүйдлийн байдалтай эхний өдрийг өнгөрүүлж байсан. Би ганцаараа энэ түвшинд хүрч чадахгүй, цэцэрлэгийн хамт олны минь шагнал юм болов уу гэж боддог.

-Таны мэргэжлийн хамгийн сайхан зүйл юу вэ? Шинэ залуу багш нартаа хандан юуг хэлэх вэ?

-Хааяа зэмлэх үе гардаг ч хэсэгхэн хугацааны дараа мартчихсан л хайр цацруулаад гүйж байдаг цагаахан үнэхээр хөөрхөн байдаг. 2016 онд төвийн бүсийн багш нарын сайн хичээл үйл ажиллагаа болсон, тэр үеэр өөрийгөө ямар түвшинд байгаагаа мэдэрч байсан. Ямар ч зүйлийг хийсэн чадна мэднэ гэсэн чин зорилготой байх ёстой юм билээ. Өөрөө өөртөө эзэн нь байгаарай гэж хэлмээр байна.

-Ярилцсанд баярлалаа.