Ulaanbaatar
Хөвсгөл аймгаас “Улсын сайн малчин” 7 тодорлоо
ОРОН НУТГИЙН МЭДЭЭ | ХӨВСГӨЛ
Хөвсгөл аймгийн малчид мал сүргээ 5 төрөл дээр өсгөн үржүүлж оны эцсийн мал тооллогоор 5 сая гаруй мал тоолуулж улсын хэмжээнд мал сүргийн тоо толгойгоор хоёрт билээ. Сар шинийн босгон дээр Хөвсгөл аймгаас “Улсын сайн малчин” 7, “Улсын аварга саальчин” 1 шалгарчээ.
“Монгол улсын сайн малчин”-аар Алаг-Эрдэнэ сумын малчин Бүүвэйн Баттогтох , Ренчинлхүмбэ сумын малчин Чадраагийн Зинамидаг, Төмөрбулаг сумын малчин Банзрагчийн Дашдондог, Шинэ-Идэр сумын малчин Лааганы Мишиг, Бүрэнтогтох сумын малчин Чойжилсүрэнгийн Ванчинбазар, Галт сумын малчин Гомбо-Очирын Шаравжамц, Жаргалант сумын малчин Жанжаагийн Гомбосүрэн, “Монгол улсын аварга саальчин” цол тэмдгээр Баянзүрх сумын малчин Өвгөлжийн Эрдэнэчимэг тодорчээ. Аваргуудын шагналуудыг УИХ-ын гишүүд болон аймаг орон нутгийн удирдлагууд малчны хотонд гардуулан өгөх ажээ.
Тус аймагт мянгат малчин 624, хоёр мянгат малчин 15 байгаа бөгөөд өнгөрсөн жил бүх малаа 23 сум, 5 төрөл дээр нь 17 сум өсгөж мал аж ахуйн салбарын өсөлт нь аймгийн дотоодын нийт бүтээгдэхүүний хэмжээг нэмэгдүүлж тус салбарын орлогын хэмжээг нэмэгдүүлэх нөхцөл болж байгаа ажээ.
Б.Гантуяа
