Ulaanbaatar
Пиротехникийн хэрэгсэлтэй холбоотой анхааруулга гаргав
ОРОН НУТГИЙН МЭДЭЭ | БАЯН-ӨЛГИЙ
Баян-Өлгий /МОНЦАМЭ/. Шинэ жилийн баяр ойртож байгаатай холбогдуулан аймгийн Онцгой байдлын газраас анхааруулга гаргажээ.
Тус анхааруулгад: "Иргэд пиротехникийн хэрэгслийг зөвшөөрөлгүй газраас худалдан авч, улмаар салют буудуулах, сүлд модыг чимэглэхдээ өөрсдөө дур мэдэж хэрэглэх, мэргэжлийн бус хүнээр хийлгэдгээс болж бэртэж гэмтэх тохиолдол өмнөх жилүүдэд тохиолдож байсан. Иймд, иргэн та чанар, аюулгүйн шаардлага хангаагүй хаана, хэзээ үйлдвэрлэсэн, хэрэглэх заавар нь тодорхой бус, стандартын шаардлага хангаагүй, тайлбаргүй, баталгаагүй пиротехникийн хэрэгсэл /салют/-ийг хувь хүний гар дээрээс худалдан авахгүй байх, зарж борлуулахгүй байх, цагаан бенгалын галыг хялбар шатах материалын ойролцоо цацруулахгүй байх, цацарч дууссаны дараа шатамхай цаас, саа, хөвөн гэх мэт зүйл дээр хаяхгүй байх, насанд хүрээгүй хүүхдэд уг хэрэгслийг ашиглуулахгүй байх, ашиглалтын аюулгүй байдлыг хатуу сахин биелүүлж, болзошгүй эрсдэлээс урьдчилан сэргийлэхийг Онцгой байдлын газраас анхааруулж байна" хэмээжээ.
Дашрамд хэлэхэд, тус аймагт пиротехникийн хэрэгсэл худалдаалах тусгай зөвшөөрөлтэй хувь хүн, аж ахуйн нэгж байхгүй юм.
Ө.Нурболат
