Дээд, өндөр түвшний харилцан айлчлал зохион байгуулах талаар санал солилцов

МОНГОЛЫН МЭДЭЭ | ГХЯ-НЫ МЭДЭЭ
ariunbold@montsame.gov.mn
2022-05-12 16:49:07

Улаанбаатар /МОНЦАМЭ/. Монгол Улсын Гадаад харилцааны яам, Их Британи Умард Ирландын Нэгдсэн Хаант Улсын Гадаад хэрэг, хамтын нөхөрлөл, хөгжлийн яамны Улс төрийн зөвлөлдөх уулзалт өнөөдөр Улаанбаатар хотод болов.


Зөвлөлдөх уулзалтыг монголын талаас Гадаад харилцааны дэд сайд Б.Мөнхжин, британийн талаас Гадаад хэрэг, хамтын нөхөрлөл, хөгжлийн яамны Ази, Ойрхи дорнодын асуудал хариуцсан Төрийн сайд Аманда Миллинг нар тэргүүлэв.


Зөвлөлдөх уулзалтаар талууд Монгол, Британийн харилцаа, хамтын ажиллагааны өнөөгийн байдлыг дүгнэн, цаашид хоёр талын хамтын ажиллагааг идэвхжүүлэх, тэр дундаа ирэх 2023 онд хоёр улсын дипломат харилцаа тогтоосны 60 жилийн ойг хамтран тэмдэглэх, дээд, өндөр түвшний харилцан айлчлалыг зохион байгуулах талаар санал солилцов.


Мөн Монгол, Британийн хооронд Түншлэл, хамтын ажиллагааны хэлэлцээр байгуулах яриа хэлэлцээг ойрын хугацаанд эхлүүлэх нь хоёр талын хамтын ажиллагааг бүхий л салбарт өргөжүүлэн хөгжүүлэхэд чухал ач холбогдолтойг талууд онцлов. Түүнчлэн талууд олон улсын харилцааны зарим асуудлаар санал солилцож, бүс нутгийн аюулгүй байдлыг хангахад чиглэсэн санал, санаачилгуудын талаар ярилцав.

Related news