Гар утас хязгаарласнаар сурлагын чанарт эерэг нөлөөлнө

МОНГОЛЫН МЭДЭЭ | БОЛОВСРОЛ
boloroo8136@gmail.com
2016-09-21 15:42:03

БСШУС-ын сайд Ж.Батсуурь энэ сарын 16-нд А/43 тоот тушаал гарган сургуулийн орчинд гар утас, цахим хэрэгслийн хэрэглээний талаар авах арга хэмжээний тухай зарим зохицуулалт хийсэн. Үүнтэй холбогдуулан БСШУСЯ-наас өнөөдөр мэдээлэл хийв.

Хүүхдүүд гэмт хэрэг, хүчирхийллийн хохирогч болох тохиолдол цөөнгүй гарч байгаа учраас сургуулийн орчинд гар утасны зохистой хэрэглээ бий болгохыг хүссэн иргэд, олон нийтийн хүсэлтийг үндэслэн дээрх тушаалыг гаргажээ. Харин завсарлага, хичээлийн бус цагаар хэрэглэх нь нээлттэй юм.

Харилцаа холбооны зохицуулах хорооны тайланд интернэт хэрэглэгчдийн тоо 2014 оны байдлаар 1.962.000 болсноор 2013 оныхоос 28 хувиар өсч, 2015 оны байдлаар 1.881.783 хүн ухаалаг гар утас хэрэглэж байгаа нь өмнөх оноос 56.4 хувиар нэмэгджээ.

Фэйсбүүк, ухаалаг утаснаас үүдэлтэй гэмт хэрэг, дарамт, цахим тоглоомоос шалтгаалан сэтгэц, зан төлөвийн өөрчлөлтөд орсон, сурах чадвараа алдсан хүүхдийн тоо сүүлийн жилүүдэд өсч, эдгэршгүй өвчин болж байна. Эдгээр тулгамдсан асуудлын шалтгаан нь цахим хэвлэл, мэдээллийн талаарх иргэд, өсвөр үеийнхний мэдлэг хангалтгүй байдал, интернэтийн хязгаарлалтгүй орчин дахь замбараагүй хэрэглээ, эрхзүйн хяналт, зохицуулалтын дутмаг байдлаас болж байгааг албаныхан хэлж байна.

БСШУС-ын сайд Ж.Батсуурь хэлэхдээ, “ЕБС-ийн багш, сурагчдад хичээлийн цагаар гар утас хэрэглэхийг хориглосон тушаал нь бага насны хүүхдийн эрүүл мэндийг хамгаалахад онцгой ач холбогдолтой. Мөн сургалтын чанарт эерэг нөлөөлнө гэж үзэж байна. Хичээлийн цаг бол багш, сурагчдын анхаарлаа төвлөрүүлэх чухал цаг хугацаа. Гэтэл сүүлийн үед сурагчид гар утсыг түгээмэл хэрэглэдэг болсноор хичээлийн үеэр утас нь дуугарч, бусдын анхаарлыг сарниулах, хичээлийн цагаар утсаар цахим орчинд нэвтэрч байна. Хичээлийн цагаар гар утсыг хязгаарласнаар сурагчид зөвхөн сурч боловсрохдоо анхаарлаа хандуулж, цаг заваа зарцуулах болно. Цаашид сургалтын чанарт сөргөөр нөлөөлж буй шалтгааныг бууруулж, бүх шатны сургалтын чанарыг сайжруулахын төлөө ажиллана” гэв.

Энэхүү тушаалын хэрэгжилтэд сургуулийн удирдлага, багш ажилчид хяналт тавина.

Ж.Болор

Гэрэл зургийг Н.Батбаяр

 

 

 

Related news