Ulaanbaatar
Өсвөр үе, залуусын 50 гаруй хувь нь цахим дээрэлхэлтэд өртжээ
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Манай улсын өсвөр үе, залуусын 50 гаруй хувь нь цахим дээрэлхэлтэд өртжээ.
Цахим дээрэлхэлтийн хамгийн түгээмэл хэлбэр нь доромжлол,
гүтгэлэг гэдгийг НҮБ-ын Хөгжлийн хөтөлбөрийн судалгаанд дурдсан байна. Энэ нь
залуусын цахим орчин дахь аюулгүй байдлыг хангах, сэтгэцийн эрүүл мэнд, сайн
сайхан байдлыг дэмжих үйл ажиллагааг хэрэгжүүлэх шаардлагатайг
илтгэж байна. Иймд ЦХИХХЯ НҮБ-ын Хөгжлийн хөтөлбөртэй хамтран
өсвөр үе, залууст тулгарч буй
цахим дээрэлхэлт, цахим орчны эрсдэлийн тухай хөндөж, боломжит шийдлийг эрэлхийлэхээр “Залуусын цахим аюулгүй байдал” олон талт хэлэлцүүлгийг зохион
байгууллаа.
Энэ үеэр төр,
иргэний нийгэм, боловсрол, технологийн салбарын төлөөлөл, залуус оролцож өсвөр үе, залуусын цахим аюулгүй байдлыг хангах, илүү хүртээмжтэй, аюулгүй орчныг
бүрдүүлэх бодлого, стратегийн талаар санал солилцсон юм.
Монгол дахь НҮБХХ-ийн Суурин төлөөлөгч Матилда Димовска хүртээмжтэй
хөгжил дэвшлийн ач холбогдлыг онцлоод, “Цахим шилжилт нь хүн төвтэй,
хүртээмжтэй, аюулгүй байх шаардлагатай. Дижитал эрин зуунд өсвөр үе, залуусын аюулгүй байдлыг хэрхэвч мартаж
болохгүй. НҮБ-ын Хөгжлийн хөтөлбөр
Монголд залууст
ээлтэй, аюулгүй дижитал ирээдүйг бүтээж, цахим дээрэлхэлтийг арилгахын тулд төр засаг, залуус, иргэний нийгэм,
хувийн хэвшлийн түншүүдтэйгээ хамтран ажиллана” гэв.
ЦХИХХЯ-ны Кибер аюулгүй байдлын бодлогын хэрэгжилтийг зохицуулах газрын дарга Ц.Пүрэвням, “Цахим орчин хүүхдүүдэд сурч хөгжих шинэ боломж олгодог ч, кибер аюул занал, дарамт, худал мэдээлэл, залиланд өртөх эрсдэлийг нэмж байна. Иймд залуусыг "хэрэглэгч" байхаас гадна, хариуцлагатай, ухамсартай, мэдлэгтэй иргэн болгон төлөвшүүлэхэд анхаарах шаардлагатай. Үүнд Засгийн газраас гадна эцэг эх, боловсрол, иргэний нийгэм, технологийн болон олон улсын байгууллага зэрэг оролцогчдын олон нийтийн цахим ур чадвар, мэдлэгийг сайжруулах санал санаачилга, хамтын ажиллагаа ач холбогдолтой” гэсэн юм.
Интернэт орчныг аюулгүй болгох нь зөвхөн технологи бус соёл, боловсрол, бодлого, хамтын ажиллагааны асуудал учир ЦХИХХЯ-наас “Цахим орчинд хүүхдийг хориотой болон хүүхдэд хортой агуулгаас урьдчилан сэргийлэх, хамгаалах журам”-ыг батлуулаад байгааг тус яам мэдээлжээ.
