Ulaanbaatar
Мал эмнэлгийн үйлчилгээг сайжруулахыг зорьж байна
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Мал эмнэлгийн ерөнхий газар Дэлхийн мал амьтны эрүүл мэндийн байгууллага, НҮБ-ын ХХААБ хамтран бог малын мялзан өвчнийг устгах үйл ажиллагааны чиглэлээр бүсийн хурлыг Улаанбаатарт зохион байгууллаа.
Бог малын мялзан өвчнийг дэлхийн хэмжээнд хянах, устгах стратегийг 2015 онд баталсан бөгөөд 2030 он гэхэд энэ өвчнийг бүрэн устгах, мал эмнэлгийн үйлчилгээг сайжруулах, нөлөөлөх, бусад халдварт өвчний нөлөөг бууруулах зорилт тавиад байгаа. Засгийн газар бог малын мялзан өвчнийг 2030 он гэхэд устгах зорилт бүхий дэлхийн энэ хөтөлбөрийг дэмжиж байгаа. Сүүлийн жилүүдэд Монгол Улс, хөрш орнуудад бүртгэгдсэн дэгдэлтүүд нь энэ өвчнийг устгахын тулд уялдаа холбоотой ажиллах, мал эмнэлгийн үйлчилгээг бэхжүүлэх, хил дамнасан хамтын ажиллагааг сайжруулах шаардлагатайг харуулж байна.
Дэлхийн хэмжээнд бог малын мялзан өвчнийг устгах хөтөлбөрийн хоёрдугаар үе шатанд нэвтрүүлсэн тархвар зүйн системийн (эписистемийн) чиг хандлага нь бог малын мялзан өвчнийг тархалтад нөлөөлж буй олон хүчин зүйлийг нэгтгэх замаар өвчнийг хянах, устгах стратегийг сайжруулах үр дүнтэй арга зам болох юм. Тус хурлыг Монголд зохион байгуулснаар бог малын мялзан өвчинтэй тэмцэх, устгах үйл ажиллагааг Дэлхийн мал, амьтны эрүүл мэндийн байгууллагын стандарт, заавар, зөвлөмжийн дагуу зохион байгуулж буйгаа танилцуулж, экспортыг нэмэх боломжийг бүрдүүлэхийг ХХААХҮЯ мэдээлжээ.
