Ulaanbaatar
Текстилийн боловсруулах салбарт байгальд ээлтэй, тогтвортой үйлдвэрлэлд шилжүүлэхэд таатай орчныг бүрдүүлнэ
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 3 /МОНЦАМЭ/. “Текстилийн тогтвортой үйлдвэрлэл ба эко тэмдэг-үе шат 2” төслийг албан ёсоор нээлээ.
Европын Холбооны санхүүжилттэй “Монголын текстилийн салбарын тогтвортой
үйлдвэрлэл ба эко тэмдэг-STeP
EcoLab" төслийн хоёрдугаар үе шат өнгөрсөн нэгдүгээр
сараас хэрэгжиж эхэлсэн байна. Энэхүү төсөл нь Монголын ноос, ноолуурын салбарт
байгаль орчинд ээлтэй, нийгмийн хариуцлагатай үйлдвэрлэлийг дэмжих зорилготой
бөгөөд төслийн эхний шатыг 2018-2022 онд хэрэгжүүлсэн юм. Төслийн нэгдүгээр
шатны хүрээнд малчдын хоршоод болон үндэсний 20 гаруй үйлдвэртэй хамтран
ажиллаж, баталгаажсан, мөшигдөхүйц түүхий эдийн хэмжээг 10 дахин нэмэгдүүлжээ.
Мөн Монгол Улсад анхны тогтвортой байдлын стандарт болох MNS 6926-2021 “Текстилийн тогтвортой үйлдвэрлэл” стандартыг боловсруулж, батлуулсан нь төслийн онцлох үр дүн аж. Монголын ноос, ноолуурын холбооны баталгаажуулалтын алба ноос, ноолуур боловсруулах үйлдвэрүүдийг энэхүү стандартын дагуу гэрчилгээжүүлснээр “Цагаан алт” хөтөлбөрийн хүрээнд ногоон санхүүжилтийг олгож эхлээд байгаа юм.
Нэгдүгээр сараас хэрэгжиж эхэлсэн “STeP EcoLab 2” төслийн зорилго нь Монголын Бичил, жижиг, дунд үйлдвэрүүдийг олон улсын ногоон нийлүүлэлтийн сүлжээнд нэгтгэхэд оршино. Үүнд, бичил, жижиг, дунд үйлдвэрүүдийг тогтвортой гэрчилгээжсэн түүхий эдийн бэлтгэлд татан оролцуулах, эко тэмдэг, гэрчилгээжүүлэлтийн системийг бататгах, олон улсад хүлээн зөвшөөрүүлэх, текстилийн боловсруулах салбарт байгальд ээлтэй, тогтвортой үйлдвэрлэлд шилжүүлэхэд таатай орчныг бүрдүүлэхэд түлхүү анхаарахыг төслийн удирдагчид хэллээ. Мөн Баянхонгор, Өвөрхангай, Архангай аймгийн 8000 гаруй малчин өрх, 180 хоршоог дэмжин ажиллах юм.
Төслийн үр дүнд Монголын ноос, ноолуурын салбар олон улсын ногоон нийлүүлэлтийн сүлжээнд нэгдэх боломжтой болж, тогтвортой үйлдвэрлэлийн шинэ үе шатыг эхлүүлэх аж.
