Ulaanbaatar
Батлан хамгаалах салбарын түүх, судалгааг багтаасан номын нээлт болов
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 3 /МОНЦАМЭ/. Батлан хамгаалахын эрдэм шинжилгээний хүрээлэнгийн эрдэмтэн, судлаачдын судалгаа, эрдэм шинжилгээний ажлыг олон нийтэд түгээх зорилгоор номын баяр зохион байгууллаа.
Номын баяраар эрдэмтэн судлаачдын 2025 онд туурвисан
“Цэргийг удирдахуйн үндэс”, “Батлан хамгаалах судлал”, “Батлан хамгаалах
салбарт эмэгтэйчүүдийн оролцоо” зэрэг 10 гаруй номыг танилцуулсан юм.
Энэ үеэр Шинжлэх ухааны гавьяат зүтгэлтэн, доктор, профессор Ш.Паламдорж
ярихдаа, “Миний хувьд “Батлан хамгаалах судлал” гэсэн ном туурвисан.
Батлан хамгаалах судлал нь аюулгүй байдал болон цэргийн шинжлэх ухааныг
багтаасан том ойлголт юм. Тийм учраас батлан хамгаалах судлалыг хөгжүүлэх
хэрэгтэй. Батлан хамгаалах судлал аль ч улс оронд байдаг. Жижиг гүрний хувьд
батлан хамгаалах бодлого судлал бол өөртөө цэргийн шинжлэх ухааныг багтаасан
судлагдахуун байдаг. Батлан хамгаалах судлалыг шинжлэх ухаан талаас нь судалж
бие даасан шинжлэх ухаан юм гэдгийг баталж нотлох үүднээс онолын боловруулалт
хийх шаардлагатай тулгарсан” гэв.
Монгол Улсын Батлан хамгаалах салбарт ажиллаж буй бие бүрэлдэхүүний 20 орчим хувийг эмэгтэйчүүд эзэлж байна. Эдгээр эмэгтэйчүүдийн нийгмийн хангамж, аюулгүй байдал, жендерийн асуудлыг хөндсөн судалгааг БХЭШХ-ийн ажилтан доктор, профессор Б.Баатарсүрэн хийж ном болон гаргажээ.
Тэрбээр хэлэхдээ, “Батлан хамгаалах салбарт эмэгтэйчүүдийн
оролцоо” бүтээлдээ батлан хамгаалах салбарт ажиллаж байгаа энгийн эмэгтэй албан
хаагч болон цэргийн эмэгтэй алба хаагчдын талаарх судалгааны үр дүнг харуулсан.
Энэ салбарт ажиллахад эмэгтэйчүүдэд ямар асуудал тулгамдаж байна, ажил мэргэжил,
ар гэрийн тэнцвэрийн хувьд дүгнэн гаргаж ирсэн үр дүнгээ Батлан хамгаалах яам, Зэвсэгт
хүчний Жанжин штаб, Үндэсний батлан хамгаалах их сургуульд санал зөвлөмж болгон
хүргүүлсэн” гэв.
Эдгээр бүтээлийг Монгол Улсын “Тогтвортой хөгжлийн үзэл баримтлал-2030”-ын хүний эрх, эмэгтэйчүүдийн чадавхыг сайжруулах, зорилтыг хангахад болон Батлан хамгаалах салбарын эмэгтэй албан хаагчдын бүтээмжийг нэмэгдүүлэх, бодлого боловсруулах үйл явцад оролцох, нөлөөлөх боломжид тодорхой хувь нэмэр оруулахын зэрэгцээ цаашид хэрэгжүүлэх арга хэмжээ, бодлого, шийдвэр гаргахад ашиглах боломжтой юм.
Номын баярт Батлан хамгаалахын сайд С.Бямбацогт, Зэвсэгт хүчний
Жанжин штабын төлөөлөгчид, ШУА-ийн болон Батлан хамгаалах эрдэм шинжилгээний
хүрээлэнгийн эрдэмтэн судлаачид оролцов.
