Ulaanbaatar
Монгол Улс ФАТФ-ын зөвлөмжийн хэрэгжилтийг ахиулсан туршлагаа хуваалцлаа
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 3 /МОНЦАМЭ/. Санхүүгийн зохицуулах хороо, БНХАУ-ын Тусгай захиргааны бүс Макаогийн Төв банк, тус бүсийн Санхүүгийн мэдээллийн алба хамтран “ФАТФ-ын Зөвлөмж 15-тай холбоотой туршлага хуваалцах уулзалт”-ыг цахимаар зохион байгуулав.
Монгол Улс Санхүүгийн хориг арга хэмжээ авах байгууллага /ФАТФ/-ын техник хэрэгжилтийн 40 зөвлөмжийг бүрэн биелүүлж, зөвлөмж 15 /Шинэ технологи/-ийн хэрэгжилтийг шинэчилсэн аргачлалаар ахиулсан. Макаогоос виртуал хөрөнгийн үйлчилгээ үзүүлэгчдийн зохицуулалтын талаар туршлага хуваалцах хүсэлт ирүүлсний дагуу дээрх уулзалтыг зохион байгуулав.
Уулзалтаар
ФАТФ-аас виртуал хөрөнгийн үйлчилгээ үзүүлэгчдийн хяналт, зохицуулалтад
анхаарах асуудлууд, тэдгээрийг шийдэх стратеги, салбарт учирч
буй шинэ төрлийн эрсдэл, зохицуулалтын хүндрэл бэрхшээл, шийдэх арга замын
талаар мэдээлэл өглөө. Мөн Монгол Улсын виртуал хөрөнгө, виртуал
хөрөнгийн үйлчилгээ үзүүлэгчийн зохицуулалтын өнөөгийн нөхцөл байдал, эрсдэлд
суурилсан хяналт шалгалтын туршлагаас хуваалцаж, мөнгө угаах, терроризмыг
санхүүжүүлэхтэй тэмцэх үйл ажиллагааны талаар танилцуулсан юм.
Хоёр улсын дараагийн харилцан үнэлгээг 2027-2029 онд хийнэ. Иймээс хамтын ажиллагаагаа өргөжүүлэх, ялангуяа эрсдэлд суурилсан хяналт шалгалтын хүрээнд хэрхэн хамтран ажиллах талаар санал солилцов.
