Ачаалж байна…
Ачаалж байна…
Цогзолмаа Г

Улаанбаатар, 2026 оны арваннэгдүгээр сарын 19 /МОНЦАМЭ/. Боловсролын яам, Анагаахын шинжлэх ухааны үндэсний их сургууль (АШУҮИС)-ийн удирдлагууд Дэлхийн эрүүл мэндийн байгууллага (ДЭМБ)-ын Монгол Улс дахь Суурин төлөөлөгч Сокорро Эскаланте болон ДЭМБ-ын Академийн багийн төлөөлөгчдийг хүлээн авч уулзлаа.
Уулзалтад Боловсролын яамны Төрийн нарийн бичгийн дарга Т.Ням-Очир, Дээд боловсролын бодлогын газрын дарга Н.Пүрэвцогт, АШУҮИС-ийн ректор Б.Дамдиндорж нар оролцож, Монгол Улсын эрүүл мэндийн салбарын хүний нөөцийн өнөөгийн нөхцөл байдал, мэргэжилтэн бэлтгэх сургалтын тогтолцоо, цаашид хэрэгжүүлэх хамтын ажиллагааны талаар санал солилцов.
ДЭМБ-ын Академийн баг нь “Нэн шаардлагатай нийгмийн эрүүл мэндийн тусламж үйлчилгээ”-г бэхжүүлэх зорилтын хүрээнд холбогдох яам, байгууллагуудтай хамтран ажиллаж, Монгол Улсын эрүүл мэндийн салбарын хүний нөөц, сургалтын хэрэгцээ шаардлагыг үнэлэх, цаашдын хамтын ажиллагааны чиглэлийг тодорхойлохоор ажиллаж байна.
Энэ хүрээнд уулзалтаар хүний нөөцийн төлөвлөлт, чадавхыг бэхжүүлэх, байгууллага хоорондын уялдаа холбоог сайжруулах, мэдээллийн системийг боловсронгуй болгох асуудлыг хөндлөө. Тухайлбал, Өвчний хяналт, сэргийлэлтийн үндэсний төв шинээр байгуулж буйтай холбоотой үндэсний болон орон нутгийн түвшинд нийгмийн эрүүл мэндийн тусламж үйлчилгээ үзүүлэх хүний нөөцийн төлөвлөлтийг оновчтой болгох шаардлагатай байгааг онцолсон юм.
Түүнчлэн нийгмийн эрүүл мэндийн салбарын ажилтнуудын боловсрол, сургалтын хэрэгцээ, ур чадвар, мэргэжлийн тасралтгүй хөгжлийн өнөөгийн байдлыг үнэлж, сургалтын тогтолцоонд байгаа орхигдол, дутагдлыг тодорхойлон нөхөх талаар санал солилцов.
Цаашид нэн шаардлагатай нийгмийн эрүүл мэндийн тусламж үйлчилгээний тэргүүлэх чиглэл, хүний нөөцийн чадавх, мэдээллийн систем болон сургалтын тогтолцоог уялдуулсан салбарын хүний нөөцийг бэхжүүлэх нэгдсэн төлөвлөгөө, санал боловсруулах чиглэлээр хамтран ажиллахаар ярилцлаа.
ДЭМБ-ын Академийн багийн хувьд бэлэн сургалтын хөтөлбөр санал болгохоос илүүтэй Монгол Улсын бодит нөхцөл байдал, хэрэгцээ шаардлагад тулгуурлан нарийвчилсан үнэлгээ хийхийг зорьж байна. Үүний үндсэн дээр эрүүл мэндийн боловсрол, хүний нөөцийн хөгжлийг дэмжих, салбар хоорондын уялдаа холбоог сайжруулах дараагийн алхмуудын эхний багц саналыг холбогдох талуудтай зөвшилцөн боловсруулах талаар Боловсролын яам мэдээлэв.