Ачаалж байна…
Ачаалж байна…
Myagmarsuren Byambajaw
.jpg&dpl=dpl_BN6dC9tsVeTXN9YjPRuZYzYutpvq)
Улиастай, 2026 оны арваннэгдүгээр сарын 20 /МОНЦАМЭ/. Өнөөдөр Дэлхийн хүүхдийн өдөр тохиож байна. НҮБ-ын Хүүхдийн эрхийн тухай конвенц батлагдсан энэ өдөр хүүхдийн дуу хоолойг сонсох, эрхийг нь хамгаалах, сайн сайхан байдлыг нь дэмжихэд дэлхий нийтийн анхаарлыг хандуулдаг.
Энэ өдрийг тохиолдуулан Завхан аймгийн Хүүхдийн төлөө зөвлөл хуралдаж, хүүхдийн санал, оролцоонд тулгуурлан аюулгүй, ээлтэй орчин бүрдүүлэх, эрсдэлт нөхцөлд байгаа хүүхдийг хамгаалах, хүүхэд хамгааллын үйлчилгээний чанар, хүртээмжийг сайжруулах чиглэлээр хэрэгжүүлсэн ажлын үр дүнгээ хэлэлцсэн талаар аймгийн ЗДТГ-аас мэдээллээ.
Завхан аймгийн Хүүхдийн төлөө зөвлөлийн IV хуралдаан болж хүүхэд хамгааллын үйлчилгээний хэрэгжилт, “За бол Заавал хийе” үндэсний хөдөлгөөний хүрээнд хийсэн ажлын үр дүнг хэлэлцэж, цаашид хэрэгжүүлэх арга хэмжээ, анхаарах асуудлыг тодорхойллоо.
Ерөнхий сайдын санаачилгаар Хүүхдийн төлөө үндэсний зөвлөлийн 2026 оны тавдугаар сарын 31-ний өдрийн 03 дугаар тогтоолоор баталсан тус хөдөлгөөн нь хүүхдийн эрх, аюулгүй байдлыг хангах, хүчирхийлэл, үл хайхрах байдал болон болзошгүй эрсдэлийг эрт илрүүлж, урьдчилан сэргийлэх, гэр бүл, сургууль, олон нийтийн орчинд хүүхдэд ээлтэй нөхцөл бүрдүүлэх зорилготой юм. Хөдөлгөөн хоёр үе шаттай хэрэгжих бөгөөд эхний шат 2026 оны арванхоёрдугаар сарын 25-ныг хүртэл, хоёр дахь шат 2027 оны нэгдүгээр сарын 1-нээс тавдугаар сарын 30-ныг хүртэл үргэлжилнэ.
Хөдөлгөөний хүрээнд аймгийн Засаг даргын А/352 дугаар захирамжаар мэргэжлийн хамтарсан баг байгуулж, хяналт шалгалт зохион байгуулан, “Сайн хөрш” үйл ажиллагааг хэрэгжүүлжээ. Мөн хүүхдийн өрөө тохижуулж, хүүхдэд ээлтэй орчин бүрдүүлсэн байгууллагуудын сайн туршлагыг түгээн дэлгэрүүлсэн байна.
Хүүхдийн санал, хүсэлтийг бодлого, үйл ажиллагаанд тусгах зорилгоор “Хүүхдээ сонсох өдөр” арга хэмжээг 13 сумын 800 гаруй хүүхдийг хамруулан зохион байгуулж, 10 чиглэлээр санал авчээ. Хүүхдүүд нийтийн тээвэр, такси үйлчилгээний хүртээмж, чанарыг сайжруулах, такси үйлчилгээг нэгдсэн бүртгэлтэй болгох, гудамж, олон нийтийн талбайн цэвэрлэгээг шуурхай хийх, замын эвдрэл, халтиргаа, ухсан нүхийг засах, явган хүний гарцын тэмдэглэгээ, гэрэлтүүлэг, хяналтын камерын хүртээмжийг нэмэгдүүлэх шаардлагатайг саналдаа дурдсан байна.
Түүнчлэн сургуулийн орчинд багш, сурагчдын эерэг харилцааг төлөвшүүлэх, сургуулийн ойролцоох дэлгүүр, цайны газрын ариун цэвэр, эрүүл ахуйг сайжруулах, хогийн сав нэмэгдүүлэх, тоглоомын талбайн эвдрэл гэмтлийг засварлах, электрон тамхины хэрэглээг таслан зогсоох саналуудыг дэвшүүлжээ.
Гэр бүлийн орчин дахь хүүхдийн аюулгүй байдлыг хангах, эрсдэлээс урьдчилан сэргийлэх чиглэлээр аймгийн Хүүхдийн зөвлөлөөс Эцэг эхийн зөвлөл болон эрсдэлийн хяналтын хорооны гишүүдийн дунд “Эрсдэлгүй орчин” сэдэвт уулзалт, хэлэлцүүлэг зохион байгуулж, 500 гаруй өрхөд эрсдэлийн үнэлгээ хийсэн байна. Үнэлгээгээр илэрсэн зөрчлийг арилгах, эрсдэлийг бууруулах чиглэлээр холбогдох байгууллагуудтай хамтран ажиллажээ.
Мөн хүүхдийн эрх, аюулгүй байдалд нөлөөлж болзошгүй эрсдэлийн талаарх мэдээллийг E-Mongolia системийн E-Kids цэсээр дамжуулан мэдээлэх боломж бүрдүүлсэн нь иргэд, эцэг эх, асран хамгаалагчдын хүүхэд хамгааллын ажилд оролцох нэг арга хэрэгсэл болж байна.
Хүүхэд хамгааллын тухай хуулиар Хүүхдийн төлөө үндэсний болон орон нутгийн зөвлөл нь хүүхэд хамгааллын бодлогын хэрэгжилтийг уялдуулан зохицуулах, тайланг хэлэлцэх, холбогдох байгууллагуудад чиглэл, зөвлөмж өгөх үүрэгтэй.
Иймээс энэ удаагийн хуралдаанаар хүүхдийн санал хүсэлтийг бодит ажил хэрэг болгох, эрсдэлээс урьдчилан сэргийлэх, хүүхэд бүрд аюулгүй, ээлтэй орчин бүрдүүлэхэд салбар хоорондын хамтын ажиллагааг эрчимжүүлэх шаардлагатайг онцоллоо.