Ачаалж байна…
Ачаалж байна…
Altantsetseg .G

Баян-Өндөр, 2026 оны арваннэгдүгээр сарын 18 /МОНЦАМЭ/. “Эрдэнэт үйлдвэр” ТӨҮГ-ын Соёл, спортын цогцолбор “CuMo Arena”-гийн нээлтийн цуврал үйл ажиллагаа үргэлжилж байна.
Өчигдөр тус ордонд “Omni Erdenet Miners”, “Selenge Bodons” багийн нөхөрсөг тоглолт болсон бөгөөд энэ үеэр Орхон аймгийн ИТХ-ын дарга Д.Мөнхбат, “Эрдэнэт үйлдвэр” ТӨҮГ-ын Хамтын ажиллагаа, нийгмийн харилцааны бодлогын газрын дарга Ц.Бат-Энх, “Эрдэнэтийн уурхайчид” багийн Удирдах зөвлөлийн дарга Б.Пүрэвсүрэн нар хамтран ажиллах санамж бичигт гарын үсэг зурлаа.
Санамж бичгийн гол зорилго нь Орхон аймгийн хүүхэд, залуучуудын дунд сагсан бөмбөгийн спортыг хөгжүүлэх, тэдний авьяас, ур чадварыг нээн илрүүлж, хөгжих боломжийг нэмэгдүүлэхэд чиглэж байна.
Хамтын ажиллагааны хүрээнд ХБНГУ-ын “Альба Берлин” клубийн арга зүйд суурилсан “Үндэс дэлгэрүүлэх” хөтөлбөрийг аймгийн ерөнхий боловсролын бүх сургуульд хэрэгжүүлэхээр боллоо.
Хөтөлбөрөөр 66 багшийг олон улсын дасгалжуулагчийн сургалтад хамруулж, мэргэшүүлэх юм. Улмаар хүүхэд, залуучуудад насны онцлогт нь тохирсон сагсан бөмбөгийн сургалт, бэлтгэлийг мэргэжлийн дасгалжуулагчдын удирдлага дор тогтмол явуулна. Ингэснээр хүүхдүүдийн бие бялдар, спортын ур чадварыг хөгжүүлэхийн зэрэгцээ авьяаслаг тамирчдыг бага наснаас нь илрүүлж, мэргэжлийн түвшинд бэлтгэх боломж бүрдэх юм.
Хөтөлбөрт хамрагдсан хүүхдүүдээс 90 шилдэг тамирчныг сонгон “Omni Erdenet Miners” академид элсүүлэхээр төлөвлөжээ. Энэ нь ирээдүйн мэргэжлийн тамирчдыг бага наснаас нь бэлтгэх, спортын замналаа эхлүүлэхэд нь дэмжлэг болох юм.