Ачаалж байна…
Ачаалж байна…
Чойжамц Отгонцэцэг

Сүхбаатар, 2026 оны арваннэгдүгээр сарын 19 /МОНЦАМЭ/. Сэлэнгэ аймагт 2027 онд улсын төсвийн хөрөнгө оруулалтаар нийт 38 төсөл, арга хэмжээ хэрэгжүүлэхээр төлөвлөжээ. Эдгээр төслийн нийт төсөвт өртөг 429.97 тэрбум төгрөг бөгөөд ирэх онд 126.87 тэрбум төгрөгийн санхүүжилт хийхээр улсын төсвийн төсөлд тусгасан байна.
Энэ нь Сэлэнгэ аймгийн нийгэм, эдийн засгийн хөгжил, иргэдийн амьдрах орчин, төрийн үйлчилгээний чанар, хүртээмжийг сайжруулахад чиглэсэн хөрөнгө оруулалтын томоохон багц юм. Төсөл, арга хэмжээнүүд бүрэн хэрэгжсэнээр аймгийн дэд бүтэц, бүтээн байгуулалтыг өргөжүүлэх, орон нутгийн хөгжлийн тулгамдсан хэрэгцээг шийдвэрлэхэд чухал түлхэц болох юм.
Сэлэнгэ аймаг нь газар тариалан, хүнс, хөдөө аж ахуйн үйлдвэрлэл, худалдаа, тээвэр логистикийн салбарт улсын хэмжээнд стратегийн ач холбогдолтой бүс нутаг юм. Иймд улсын төсвийн хөрөнгө оруулалтыг үр ашигтай төлөвлөж, дэд бүтцийн хөгжилтэй уялдуулах нь үйлдвэрлэл, үйлчилгээний өсөлтийг дэмжихээс гадна иргэдийн амьдралын чанарыг дээшлүүлэхэд чухал ач холбогдолтой.
Түүнчлэн аймаг 2027 онд улсын төсөвт 12.1 тэрбум төгрөгийн орлого төвлөрүүлэхээр төлөвлөсөн нь өмнөх оны 10.0 тэрбум төгрөгөөс 2.1 тэрбум төгрөгөөр буюу 21 хувиар өссөн үзүүлэлт юм. Энэ нь Сэлэнгэ аймгийн улсын төсвийн орлого бүрдүүлэлтэд оруулах хувь нэмэр нэмэгдэхээр төлөвлөж байгааг харуулж байна.
Ийнхүү 2027 онд улсын төсвийн хөрөнгө оруулалтаар хэрэгжүүлэх 38 төсөл, арга хэмжээ болон улсын төсөвт төвлөрүүлэх орлогын төлөвлөгөө нь Сэлэнгэ аймгийн хөгжлийн бодлого, бүтээн байгуулалтын ажлыг эрчимжүүлэх, эдийн засгийн чадавхыг нэмэгдүүлэхэд чиглэж байна. Харин төлөвлөсөн хөрөнгө оруулалтыг хугацаанд нь, чанартай хэрэгжүүлж, төсвийн хөрөнгийн үр өгөөжийг иргэдэд бодитоор хүргэх нь ирэх оны гол зорилт байх юм.