Ачаалж байна…
Ачаалж байна…
Davaasuren Adiyasuren

МАНДАЛГОВЬ, 2026 оны арваннэгдүгээр сарын 18 /МОНЦАМЭ/. Дундговь аймгийн Хулд суманд төрийн албан хаагчдын нийгмийн баталгааг хангах, орон нутагт тогтвор суурьшилтай ажиллах нөхцөлийг бүрдүүлэх зорилгоор 526 сая төгрөгийн хөрөнгө оруулалтаар 10 айлын орон сууцыг сэргээн засварлаж, ашиглалтад орууллаа.
Орон сууцны түлхүүрийг төрийн албан хаагчдад гардуулан өгсөн бөгөөд үйл ажиллагаанд аймгийн удирдлага, холбогдох албаны төлөөлөл оролцжээ.Тус барилгын зураг төслийг 2023 онд боловсруулж, засвар, шинэчлэлийн ажлыг аймгийн Орон нутгийн хөгжлийн сангаас 220 сая, Хулд сумын Орон нутгийн хөгжлийн сангаас 306 сая төгрөгийн санхүүжилтээр гүйцэтгэсэн байна.
Анх 50 хүүхдийн дотуур байрны зориулалтаар ашиглагдаж байсан уг барилга сүүлийн 20 орчим жил ашиглалтгүй байсныг сэргээн засварлаж, орон сууцны зориулалтаар тохижуулснаар төрийн албан хаагчдын 10 өрх амьдрах орчин нөхцөлөөр хангагдлаа.
Дундговь аймаг төрийн албан хаагчдын нийгмийн баталгааг сайжруулах, хүний нөөцийн тогтвортой байдлыг хангах чиглэлээр “Нээлттэй Дундговь”, “Хүний нөөцийг дэмжих хөтөлбөр”-ийг хэрэгжүүлж байна.
Эдгээр хөтөлбөрийн хүрээнд албан хаагчдын орон сууцны нөхцөлийг сайжруулах, ипотекийн зээлд хамрагдахад санхүүгийн дэмжлэг үзүүлэх, орон нутагт шилжин ирж ажиллаж буй албан хаагчдыг түрээсийн орон сууцаар хангах чиглэлээр ажиллаж байгаа аж.
Энэхүү бүтээн байгуулалт нь орон нутгийн төрийн албаны хүний нөөцийг тогтвортой ажиллуулах, ялангуяа боловсрол, эрүүл мэндийн салбарын мэргэжилтнүүдийг орон нутагт ажиллаж, амьдрах таатай нөхцөлөөр хангах, иргэдэд хүргэх төрийн үйлчилгээний чанар, хүртээмжийг нэмэгдүүлэх ач холбогдолтой юм.

Төрийн албан хаагчдын хууль бусаар олсон хөрөнгийг хураах, бүх насаар нь хорих тухай өргөдлийг хэлэлцэв
Орон нутгийн мэдээ
ДАРХАН-УУЛ: Төвийн бүсийн төрийн албан хаагчдын уулзалт, зөвлөгөөн хоёр өдөр үргэлжилнэ
Орон нутгийн мэдээ
ДАРХАН-УУЛ: Иргэн төвтэй төрийн үйлчилгээг бэхжүүлэх асуудлаар хэлэлцэж байна