Улаанбаатар
Пёньянд халдвартай тэмцэх арга хэмжээнүүдийг чангатгажээ
ДЭЛХИЙН МЭДЭЭ | НИЙГЭМ
ПЁНЬЯН. /Yonhap/.
БНАСАУ-ын нийслэл Пёньян хотод
коронавирусний цар тахал дэгдэхээс урьдчилан сэргийлэх үүднээс өндөржүүлсэн бэлэн
байдлын зэрэгт шилжсэнтэй холбоотойгоор халдвартай тэмцэх арга хэмжээнүүдийг
чангатгаж байна.
“Пёньян руу аюулт
вирус нэвтрэх боломжийг хаахын тулд урьдчилан сэргийлэх арга хэмжээнүүдийг улам
идэвхтэйгээр хэрэгжүүлж байна” гэж БНАСАУ-ын төрийн мэдлийн хэвлэл мэдээллийн
хэрэгсэл мэдээлжээ.
Үүний хүрээнд Пёньяны
баруун хэсгийн Манкёндэ бүсээс нийслэл рүү нэвтрэх бүх хүн халуунаа шалгуулахаас
гадна агуулахад байгаа бараа бүтээгдэхүүнүүдийг ариутгах ёстой ажээ.
Мөн Сонгё бүсийн оршин
суугчдад халуурах юм уу амьсгалын замын өвчний шинж тэмдэг илэрч байгаа эсэхийг
өдөр бүр шалгахыг эмч нарт үүрэг болгожээ.
Лхагва гарагт
Пёньянд өндөржүүлсэн бэлэн байдлын зэрэг тогтоож, зоогийн газар, нийтийн халуун
усны газар зэрэг олон нийтийн газруудын үйл ажиллагааг түр хугацаагаар зогсоож,
хүмүүсийн хөл хөдөлгөөнийг хязгаарласан байна.
БНАСАУ улс
орондоо коронавирусний халдварын нэг ч тохиолдол бүртгэгдээгүй хэмээн мэдэгдэж
байгаа боловч халдвар тархахаас урьдчилан сэргийлэхийн тулд хилээ хаах зэрэг
арга хэмжээнүүдийг хэрэгжүүлж байгаа юм.
Дэлхийн эрүүл
мэндийн байгууллагын мэдээлснээр, БНАСАУ-д одоогийн байдлаар халдвар авсан байж
болзошгүй 700 орчим хүнийг тусгаарлаж байгаа ажээ.
