Улаанбаатар
БАЯНХОНГОР: Төрийн албан хэргийг хос бичгээр хөтөлж эхэллээ
ОРОН НУТГИЙН МЭДЭЭ | БАЯНХОНГОР
Баянхонгор, 2025 оны нэгдүгээр сарын 3 /МОНЦАМЭ/. Энэ сарын 1-нээс төрийн албан хэргийг хос бичгээр хөтөлж эхэллээ.
Монгол Улсын Засгийн газраас “Монгол бичгийн үндэсний хөтөлбөр III”-ыг баталж, 2025 оны 1 дүгээр сарын 1-нээс төрийн болон нутгийн өөрөө удирдах байгууллага албан хэргээ кирилл болон үндэсний бичгээр хөтөлнө гэж заасны дагуу Баянхонгор аймаг 2024 онд бэлтгэл ажлыг бүрэн хангасан юм.
Тодруулбал, “Монгол бичгээр үйлдэх баримт бичгийн хэвлэмэл хуудас, түүний бүрдэлд тавих үндсэн шаардлага”-ыг биелүүлж, MNS6395:2022 стандартын дагуу аймгийн төрийн болон төрийн өмчит байгууллагуудын монгол бичгийн албан хэвлэмэл хуудасны эх бэлтгэх, хянаж, олгох ажлыг эрчимжүүлж төрийн 180 байгууллагыг 423 төрлийн 48 загвар бүхий 137.315 ширхэг хэвлэмэл хуудсаар хангажээ.
Мөн монгол үндэсний бичгийн хэрэглээг жигдрүүлэх зорилгоор аймгийн ЗДТГ-аас Хэлний бодлогын зөвлөлтэй хамтарч аймаг, сумын ИТХ, ЗДТГ, төрийн бүх шатны байгууллагын архив, бичиг хэргийн 579 ажилтныг гурван хэсэг болгон мөрдөх стандарт, программ хангамж, монгол бичгийн арга зүйн талаар есөн удаагийн давтамжтай сургалт дадлагыг явуулж, захирамж, тушаал, албан бичгийг хослуулан хэрэглэж эхлээд байна.
Төрийн нийт байгууллага захирамж, тушаал, албан бичгээ үндэсний монгол бичгээр бичиж бэлтгэх, харилцан солилцох туршилтыг 2024 оны зургаадугаар сарын 1-нээс аймгийн хэмжээнд эхлүүлсэн бол архив, бичиг хэргийн нийт ажилтныг 12 дугаар сард монгол үндэсний бичгийн түвшин тогтоох шалгалтад хамруулсан зэргээр бэлтгэл ажлуудыг хангаад байгаа юм.
